Bi dehan parlamenterên li Parlamanta Ewropayê, ji bo ji nû ve avakirina Kobanê bang li Yekîtiya Ewropayê (YE) û Komîsyona Ewropayê kirin.

Parlamenterên ji Koma Konfederal a Çep a Yekbûyî ya Ewropayê, Kesk, Demokratên Civakî, Demokratên Lîberal a Ewropayê, Koma Demokrasiyê ya Rasterast û Azadiyê ya Ewropayê, Demokratên Xiristiyan, Muhafazakar-Reformîst pêk dihatin ji bo Kobanê bang li YE’yê kirin.
Di daxuyaniyê de bal kişandin ser êrîşên li ser Kantona Kobanê û hat gotin ku di serî de jin û gelê Kurd di bin banê hêzên YPG û YPJ’ê de berxwedanek mezin nîşan dane û Koalîsyonê jî ji hewayî piştgirî daye vê berxwedanê.

Parlamenteran got ku Kobanê bi saya berxwedan û piştgiriyê azad bûye û berxwedana Kobanê wek azadiya jinê, pêşerojek azad û mafê mirovan digirin dest. Her wiha hat diyar kirin ku beşeke mezin a Kobanê hilweşiyaye û divê demildest Kobanê bê avakirin.

DIVÊ PIŞTGIRÎ BÊ DAYÎN

Parlamenteran diyar kir ku ji bo avakirina Kobanê korîdorek hatiye vekirin, xebat hatine destpêkirin û divê saziyên navneteweyî jî piştgiriyê bidin xebatan.

Di daxuyaniyê de hat destnîşankirin ku divê dewletên endamên YE’yê piştgiriyê bidin avakirina Kobanê û ji bo şervanên Kurd û sivîlan korîdora alîkariya mirovahî bê vekirin.

Parlamenterên îmze avêtin daxuyaniyê:

"Gabriele Zimmer, seroka GUE-NLG; Marie-Christine Vergiat, Hevserokê Koma Dostaniya Kurdan; Philippe Lamberts, Serokê Koma Keskan; Bodil Ceballo, Koma Dostaniya Kurd a Keskan; Ana Gomes, Koma Tifaqa Demokrat û Sosyalîstan; Izaskun Bilbao Barandica, Vice-Chair, Pavel Telička, Koma Tifaqa Demokrat û Lîberana bo Ewropayê; Fabio Massimo Castaldo,  Koma Demokrasî û Ewropaya Azad; Mariya Gabriel, Koma Partiya Gel a Ewropayê (Demokratên Xiristiyan); Jana Žitnanska, Koma muhafazakar a Ewropayê û koma Reformîst."