Nobeda Azadiyê, ku ji bo azadiya Rêberê Gelê Kurd Abdullah Ocalan li ber avahiya Konseya Ewropayê ya li bajarê Strasboûrg ê Fransayê tê girtin, kete hefteya 291. Nobedarên vê hefteyê endamên Tevgera Jinên Kurd li Ewropayê (TJK-E) ne.

Jinên ji Başûrê Fransayê hatin, roja Yekşemê nobed ji koma ji paytexta Awûstûrya Viyanayê dewr girtin. Medîha Demîr, Şerefnas Boksor, Cevahîr Iliman û Adalet Bîlîr vê hefteyê nobedê digirin.

AZADIYA OCALAN JI BO ROJHILATA NAVÎN A DEMOKRATÎT ŞERT E

Jinên ku li gel serma û seqemê nobedê digirin, ji roja Yekşemê ve li ser jiyan, nêrîn û têkoşîna Ocalan agahiyê didin mirovên li derdorê. Jin bi vê armancê belavokan belav dikin û sohbetê bi welatiyan re dikin.

Nobedarên vê hefteyê destnîşan kirin ku azadiya Ocalan ji bo jiyaneke wekhev, demokratîk û aştiyane ya li Kurdistan û Rojhilata Navîn, pêwîst e. Çalakgeran bang li Konseya Ewropayê û Komîteya Pêşîgirtina li Êşkenceyê (CPT) kirin ku ji bo hevdîtin bi Ocalan re were kirin, tavilê bikevin nava liv û tevgerê.

Jinan bang li gelê Kurd jî kirin ku li dijî faşîzma AKP-MHP'ê rabin ku ev faşîzm hewl dide li Efrînê û gelemperiya Kurdistanê komkujiyan bike.

JI 25'Ê HEZÎRANA 2012'AN Û VIR VE BI RENGEKÎ BÊ NAVBER DEWAM DIKE

Nobenda "Azadî ji Ocalan re" ji 25'ê Hezîrana 2012'an û vir ve ji bo rakirina tecrîda li ser Ocalan bê navber dewam dike û heta niha zêdeyî 1.500 çalakger tevlî bûne.

Di çalakiyê de bi sed hezaran belavok hatin belavkirin û bi gelek mirovên ji welatên cuda yên cîhanê hatin, ji bo azadiya Ocalan û girtiyên siyasî sohbet hate kirin.