Çalakî bi deqeyeke rêzgirtinê ji bo bîranîna şehîdên şoreşê dest pê kir û piştre nûnerê Partiya Marksîst Lenînîst Komunîst (MLKP) axivî. Qiseker got, "Di têkoşîna maf û azadiyan a mirovahiyê de li Tirkiye, Kurdistan û her devera cîhanê berdêlên giran hatin dayîn û ev berdêlên hatine dayîn jî mîrateya herî mezin e ku ji nemiran ji me re maye. Hînbûna ji wan û xwedîderketina li xebatên wan, ji her demê bêhtir pêwîst e. Dibe ku cûnta qesrê ya AKP'ê êrîşên xwe zêde dike, lê belê bi dîroka xwe ya bi rûmet û bi têkoşîna xwe ya hevpar em dikarin van êrîşan pûç bikin. Ji wan heye ku bi çavtirsandinê dikarin têkoşîna me bişikînin, lê xwe dixapînin. Em ê bi têkoşîna hevgirtî, faşîzma AKP'ê têk bibin."

Di çalakiyê de Grûp Vardiya jî derket ser dikê û hunera xwe pêşkêş kir.

Parlamenterê HDP'ê yê Şirnexê Faysal Sariyildiz jî li şeva bîranîna şehîdên şoreşê axivî û girseya gel silav kir. Sariyildiz bal kişand ser darbeya siyasî ya AKP'ê û got, "Ev darbe li dijî dînamîkên HDP'ê hatiye kirin. Lê yên ku vê pûç bikin jî têkoşîna kurdan û şoreşgeran e."

Di şevê de şoreşgerên enternasyonal ên li Kobanê û gelemperiya Rojava şehîd bûn hatin bîranîn. Li ser navê girtiyan jî axaftin hat kirin. Her wiha silav ji Fîgen Yuksekdag û Selahattîn Demîrtaş re hate şandin.

Di beşa duyemîn a şevê de xizmên şehîd û girtiyan ji bo derkevin ser dikê hatin vexwendin û qurnefîl ji wan re hate dayîn. Xwişka Alî Bûgun, malbata Cebraîl û Dayika Sûltan hatin vexwendin. Xizmên şehîdan girseya gel silav kirin û banga yekîtiyê kirin.

Di çalakiyê de koma şano ya ACTÎT'ê lîstika bi navê "Hêvî bi serbilindî li ser piyan e" pêşkêş kir.

Şeva bîranînê, piştî stranên Grûp Abdal û nîşandana sînevîzyonê, qediya.