Di nava sê rojên greva birçîbûnê de belavok hatin belavkirin û hevdîtin hatin kirin.

Meşê li Meydana Ermenîstanê dest pê kir û bi qîrîna dirûşmên "Bijî berxwedana zindanan", "Ji Kurdistanê re çareseriya polîtîk" û "Bijî Serok Apo" heta Meydana Capîtolê dewam dikr. Mîtînga li vir jî bi deqeyeke rêzgirtinê ji bo bîranîna şehîdên şoreşê dest pê kir.

Piştî xwendina belavoka Civaka Demokratîk a Kurdên li Fransayê, li ser navê NPA Pîerre Granet axivî.

Granet diyar kir, grevên birçîbûnê gihîştine qonaxeke xetere û destnîşan kir, divê welatên Yekîtiya Ewropa û tevahiya raya giştî ya demokratîk li pêşberî vê rewşê bêdeng nemînin. Granet got, eger rewşeke neyînî di grevên birçîbûnê de derkeve holê, wê ev welat û raya giştî ya demokratîk jî berpirsyar bin.

Granet her wiha dengê 'NA' ku tevî dek û dolaban jî di asteke bilind de di referandûmê de derkete holê, pîroz kir.

Ji Navenda Civaka Demokratîk a Kurd a Toûloûse Alî Ataç jî diyar kir, têkoşîna gelê Kurd bi berxwedana mazlûman mezin bû.

Ataş destnîşan kir, erk û wezîfeya sereke ya gelê Kurd û dostên wan ên li Ewropayê, xwedîderketina li berxwedanê ye û divê li her cihî daxwazên girtiyan ên mafdar bên ziman.

Mîtîng bi qîrîna dirûşma "Bijî berxwedana zindanan" qediya.