Kurdistaniyên ku di saet 11:00’an de li Qada Chatelest Le Halles a paytext Parsî a Fransayê kombûn, bi armanca balê bikişînin ser tecrîda girankirî ya li ser Rêberê Gelê Kurd Abdullah Ocalan, standa agahdarkirinê vedan.

Çalakiya di pêşengtiya endamên Meclîsa Navenda Civaka Kurd a Demokratîk a Parîs û Meclîsa Vîllerneûve Saînt Georges hate lidarxistin de, dowîz û pankartên li ser “Ji Ocalan Re Azadî” hatibûn nivîsandin hildan, têkildarî tecrîga girankirî ya li ser Ocalan tê pêkanîn belavok hatin belavkirin.

Hevserokên NCKD a Vîllerneûve Saînt Georges û Parîsê Şûkran Akdogan û Mahmût Han, diyar kir ku çalakiya bi armanca azadiya Ocalan lidar xistine wê heta 23’ê Hezîranê her roj saet 11:00 heta 17:00 bidomînin.

Hevserokan anî ziman ku heta Rêberê Gelê Kurd Abdullah Ocalan azad bibe wê çalakiya xwe bidomînin û bang li hemû Kurdistanî û dostê wan ên li Parîs û derdorî wê kirin ku bi awayekî xurt beşdaîr meşa “Ji Ocalan Re Azadî” ku tê plankirin ku 24’ê Hezîranê li Parîsê bê lidarxistin kirin.