Bi îdîaya 'li derveyî qanûnan li mirovan guhdarî kirine' li hemberî polîsên nêzî cemaetê ji aliyê Midûriyeta Emniyetê ya Enqereyê ve operasyon hat destpêkirin.

Li dû lêpirsînên nelirêtiyê yên 17-25'ê Kanûnê, operasyonên hikûmetê yên li hemberî cemaetê û rêxistinbûyîna cemaetê ya di nava dewletê de, dewam dike. Îro danê sibê Midûriyeta Emniyetê ya Enqereyê, bi îdîaya ku bi awayekî dij-qanûnî li mirovan guhdarî kirine, li hemberî polîsên nêzî cemaetê dest bi operasyonê kir.

Di çarçoveya operasyonê de li hin navnîşanan lêgerîn hatin kirin û hat ragihandin ku tevî midûran der heqê 18 kesan de biryara girtinê heye.

Hat diyarkirin ku Serokê berê yê Daîreya Îstîxbaratê Omer Altiparmak û Alîkarê berê yê Midûrê Emniyeta Enqereyê Lokman Kircili jî di lîstiya yên bên binçavkirin de cih digirin.