Tê texmînkirin ku hikumeta koalîsyonê ya heyî ya li Elmanyayê, di hilbiartineke gengaz de ji nû ve bibe desthilatdar. Ji bo hilbijartinên 2021'ê ji bo namzetiya serokwezaretiyê du nav derdikevin pêş.
Li gorî lêkolîna mehane ya bi navê Deutschlandtrend ku ji aliyê şîrketa Înfratest Dîmapê ve hate kirin û li qenala ARD'ê hate weşandin, rêjeya dengê hevpar ê partiya Serokwezîr Angela Merkel CDU û Partiya Yekîtiya Xiristiyan CSU li gorî meha Tebaxê bi 2 pûanî kêm bûye û daketiye 36 ji sedî. Lê belê li gorî dema beriya şewbê, herî kêm bi 8-10 pûanî zêde bûye. Partiya Sosyal Demokrat (SPD) jî ku hevparê desthilatdariyê ye dengê xwe bi 2 pûanî zêde kiriye û bûye 17 ji sedî.
Li gorî anketê, Partiya Alternatîf ji bo Elmanyayê (AfD) ku partiyeke nijadperest e, pûanek kêm kiriye û tê payin ku 10 ji sedî yê dengan werbigire.
Partiya Kesk jî pûanek zêde kiriye û dengê wê 19 ji sedî hate pîvandin.
Li gorî lêkolînê Partiya Çep (Dîe Lînke) 7 ji sedî, Partiya Demokratên Lîberal (FDP) jî 6 ji sedî yê dengan werdigire.
Di heman lêkolînê de 66 ji sedî yê gel polîtîkayên hikumeta heyî serketî dibîne.
NAMZETÊN SEROKWEZARETIYÊ YÊN DERDIKEVIN PÊŞ: SODER Û SCHOLZ
Lîderê CSU û Serokwezîrê Eyaleta Bavyerayê Markûs Soder ku bi polîtîkayên xwe yên ewlekariyê tê naskirin, tê payin ku piştî Angela Merkel bibe namzetê hevpar ê CDU û CSU yê ji bo serokwezîrtiyê. Li gorî lêkolînê 56 ji sedî yê beşdaran Soder weke 'namzetekî baş ê ji bo serokwezaretiyê' ji bo her du partiyan dibîne. 55 ji sedî yê beşdaran jî Olaf Scholz ê ji SPD'ê weke namzetê baş ê ji bo serokwezaretiyê dibîne.
Ji Partiya Keskan jî Robert Habeck ji aliyê 42 ji sedî yê beşdaran weke namzetekî baş ji bo serokwezaretiyê tê dîtin.
