Kurdên li eyaleta Calîfornîa ya Dewletên Yekbûyî yên Amerîkayê dijîn, Newroz pîroz kirin.

Pîrozbahî ji aliyê Navenda Civaka Demokratîk a Kurd ve hat lidarxistin û Amerîkî jî beşdar bûn.

Ji Zanîngeha Stanfordê Alk. Profesor Anna-Sara Malgren, Hîndekar Firat Bozcali li pîrozbahiyê axivîn û bal kişandin ser polîtîkayên zilm û zordariyê yên li hemberî gelê Kurd tên kirin.

Sînemavanê Kurd Apo Bazidî jî li vê derê çavdêriyên xwe yên li Rojava vegot.

'JI BO MIN ÎMTIYAZEK BÛ'

Mîchael Israel ê Amerîkî, ku dema li nava refên YPG'ê li dijî çeteyên DAIŞ'ê şer dikir birîndar bû, li pîrozbahiya Newrozê axivî. Israel got, "Di tevahiya jiyana min de tecrûbeya min a herî girîng pêvajoya ku min bi xwişk û birayên xwe yên Kurd li nava refên YPG'ê derbas kiriye.

Ji ber ku tecrûbeyeke gelekî xurt bû. Cihgirtina li nava Şoreşa Rojava ji bo min îmtiyazek bû." Israel ê ku 7 mehan di nava refên YPG'ê de ma, bi pêlava xwe ya 'mekap a zer' tevlî pîrozbahiyê bû.