Li paytexta Swîsre Bernê, çalakiya piştgiriya bi Geziyê re hat lidarxistin. Di çalakiyê de xwedî li berxwedana Gezî hat derketin û hat xwestin, ku daxwazên berxwedêran bên qebûlkirin.

Li paytexta Swîsre Bernê çalakiya piştgiriya bi Geziyê re pêk hat. Çalakî bi pêşengiya hêzên pêşverû, demokrat û çepgir ên Kurdistan û Tirkiyeyî pêk hat û Parlamenterê Partiya Keskan a Swîsreyê Balthasar Glattlî jî beşdar bû.

Glattlî di axaftina xwe ya li vir de diyar kir, ku polîtîkayên AKP'ê nayên qebûlkirin û silav li berxwedêran kir.

Dûre li ser navê Meclîsa Gel a Kurd belavok hat xwendin. Di belavokê de hat destnîşankirin ku divê berxwedana Gezî bi tenê li dijî polîtîkayên tekane û faşîzan ên AKP'ê sînorkirî nemînin û divê veguhere hêzeke xurt a rêxistinbûyî.

Di çalakiyê de li ser navê ÎGÎG, Elewiyên Kurdistan û Tirkiyeyî, Platforma Surgunên Ewrûpayê û tevgerên şoreşger, axaftin hatin kirin û tundiya hukûmeta AKP'ê hat şermezarkirin.