Bi sedan Kurdistanî li paytexta Yewnanîstan Atînayê kom bûn, rakirina destnedayîna parlamenterên HDP’ê û êrîşên qirkirinê protesto kirin, berxwedana xwerêveberiyê jî silav kirin. Di meşa ku li navenda bajêr hate lidarxistin de gelek broşur û belavok hatin belavkirin.

Di meşê de li gel alên HDP’ê û wêneyên Rêberê Gelê Kurd Abdullah Ocalan wêneyên ku AKP’ê lenet û şermezar dikrin hatin hilgirtin. Di meşê de tim bi tim dirûşmeyên mîna “Bijî Berxwedana Nisêbînê” û “Kujer Erdogan” û “Terorîst Tirkiye” hatin berzkirin.

Piştî meşê li pêşiya sefaretxaneya Tirk mîtîngek hate lidarxistin. Di mîtîngê de li ser navê Navenda Civaka Kurd a Demokratîk Kendal Semsûr axivî û diyar kir ku gelê Kurd dest ji azadiya xwe bernade. Semsûr wiha got: “Gelê me her tim ji bo azadiyê berdêlên giran dane. Çi berdêl bê xwestin wê bidin û dest ji azadiya Kurdistanê bernadin. Heta ku Rêber Apo di Îmaraliyê de girtî be wê Tayyîp jî di Qesra xwe de rehet rûnenê û wê her roj bi tirseke nû ve ji xewê şiyar bibe.”