Namzeta parlamenteriyê ya HDP’ê ya Wanê Mukaddes Karakoç got li dijî tifaqa faşîst û gemarî ya AKP-MHP’ê Kurd bi yekîtiyê wê bersivê bidin û lîstikê xira bikin.

Li Wanê xebatên hilbijartinê kuçe bi kuçe, mal bi mal têne kirin. Jin û ciwan pêşengiyê ji xebatan re dikin. Karakoç go bi vê hêz û vînê HDP li Wanê wê 8 parlamenteran derxîne û got, ‘’24’ê Hezîranê dengek ji HDP’ê re, dengek ji Demîrtaş re.’’

BLOKA FAŞÎST A AKP-MHP’Ê GEMARÎ YE

Karakoç diyar kir ku li Wanê xebat bi coşiyekê didomin, got HDP ji roja ku hatî avakirin tim bûye dengê Kurdan û gelên çewisandî û domand: ‘’Bloka faşîst a AKP-MHP’ê gemarî ye. Vê bloke tenê êş ji Kurdan û gelên din re anî. Li gorî van Kurd nîn in û ‘Kurdê baş ê mirî ye’.

Îro van du hişmendiyan li dijî Kurdan tifaq danîne. Kurd wê lîstika vê bloka faşîst û gemarî bi yekîtiyê xira bikin. Kurd li dijî vê hişmendiya faşîst 24’ê Hezîranê biçin ser sendoqê û wiha bersivê bidin.’’

RÊYA AZADIYÊ DI HDP’Ê RE DIÇE

Karakoç diyar kir ku HDP partiya jin û ciwanan e û rêya azadiyê, aştiyê di HDP’ê re diçe. Karakoç got jinên Wanî bi vê hişemdiyê tevlî nav xebatan dibin û got, ‘’Bi vîn û hêza jinê HDP wê serkeftineke mezin bîne.’’

Karakoç got ew li navenda Wanê û navçeyan pir dixebitin, çi devera ku diçinê dibe mîna mîtîngê, gel bi dilgermî pêşwaziya wan, partiyê dike û jin pêşengiya xebatan dikin. Karakoç got, ‘’Bi vîna xurt a jin û ciwanan HDP wê serkeftineke mezin bîne.’’

24’Ê HEZÎRANÊ DENGEK JI HDP’Ê, DENGEK JI DEMÎRTAŞ RE

Karakoç got ev vîna xurt li Wanê wê 8 parlamenteran bîne û got, ‘’HDP ji bo ku partiya gelan e; hemû derdorên Wanê li bin banê HDP’ê hatin cem hev. HDP ku partiya aştî, biratî û hêviyê ye, di serî de li Wanê, li herêmê û Tirkiyê wê serkeftineke mezin bîne. Bi vê hêviyê, em bang li gelê Wanê dikin ku 24’ê Hezîranê biçin ser sendoQê û dengekî bidin HDP’ê, yekî bidin Demîrtaş.’’