Çalakiya Nobeda 'Ji Ocalan re Azadî' ku di 25'ê Hezîrana 2012'an de li ber avahiya Konseya Ewroapyê ya li bajarê Strasboûrg ê Fransayê dest pê kir, di hefteya 230. de ye.

Vê hefteyê Kurdistaniyên bi navê Kemal Aktaş, Ahmet Seçîlmîş, Muslum Kûş, Haci Kaya û Cemalettîn Demîr ên ji bajarê Darmstadt ê Elmanyayê hatin, nobedê digirin.

Li ser navê koma Darmstadtê Kemal Aktaş axivî û spasiya her kesên heta niha tevlî çalakiyê bûne kir. Aktaş diyar kir, ji bo wan gelekî girîng e tevlî vê çalakiya ji bo azadiya Ocalan dibin.

Aktaş da xuyakirin, ku heta Rêberê Gelê Kurd Abdullah Ocalan dîlgirtî be, wê vîna gelê Kurd jî dîlgirtî be û işaret bi girîngiya çalakiyên ji bo azadiya Ocalan kir.

Endamên komê li ber avahiyên Konseya Ewropayê, Dadgeha Mafên Mirovan a Ewropayê û Komîteya Pêşîgirtina li Îşkenceyê ya Konseya Ewropayê (CPT) nobedê digirin. Nobed ev 230 hefte ne bênavber her roj dewam dike. Nobed danê sibehê dest pê dike û heta saet 17:00 ê êvarê dewam dike.

Di çarçoveya çalakiyê de heta niha di nava 4,5 salan de bi sed hezaran belavok hatin belavkirin û li ser jiyana Ocalan û pirsgirêka Kurd agahî hatiye dayîn.