Koordînasyona Gîştî ya Rêveberiya Xweser bi daxuyaniyekê ji civaka navneteweyî xwest ku piştgiriyê bidin berxwedaniya hêzên enternasyonal ku şerê terorê dikin.

Der barê êrîşên dawî yên çeteyên El-Nusra, Ehrar El-Şam û DAIŞ’ê ku li hev kirine û bi awayekî hevbeş êrîşî Kantona Efrînê dikin de, Koordînasyona Giştî ya Rêveberiya Xweseriya Demokratîk a her sê Kantonên Rojava daxuyaniyek da raya giştî ya cîhanê.

Di daxuyaniyê de wiha hat gotin:

“Piştî serketinên ku YPG, YPJ û Asayîşa Rojava, her wiha hêzên ku di bin sîwaneya wan de li eniyên şer diman û karîbûn ewlehî û aramiya herêmên Cizîrê û Kobanê biparêzin, Çeteyên El-Nusra û hevkarên wan Ehrar El-Şam xwestin bala cîhanê ji ser van serketinan bibin. Çeteyan bi tank û topan êrîşî gelek gundên herêma Efrînê kirin. Şervanên Yekîneyên Parastina Gel (YPG) û Yekîneyên Parastina Jin (YPJ) û Asayîşa Rojava bersiva êrîşan dan û ew têk birin.

Wekî koordînasyona Gîştî ya Rêveberiya Xweseriya Demokratîk a Rojava-Sûriye mafê me yê ku herêmên xwe ji hemû êrîşên ji aliyê komên çete ve tên biparêzin heye.

Em bang li hemu hêzên navneteweyî yên rast û durist dikin ku alîkariyên bidin hêzên enternasyonal (YPG û YPJ) ku li hemberî terorê şer dikin, da ku karibin êrîşên çeteyan li hemû dever û bajarên Suriyeyê bişkînin. Meşa me ya di warê avakirina Sûriyeyeke yekgirtî, demokratîk û federal dewam dike.”