Desteya Rêveberiya Navendî ya HDP'ê bi wesîleya salvegera êrîşên qirkirinê yên sala 2015'an, daxuyaniyeke nivîskî weşand.

Di daxuyaniyê de hate bibîrxistin, ku ji 16'ê Tebaxa 2015'an û pê ve dor li 11 bajar û 49 navçeyan hate girtin û vê yekê rê li ber têkçûneek giran a însanî û civakî vekir.

Di daxuyaniyê de hate ragihandin, bêhiqûqiya hate kirin û binpêkirina mafên mirovan bi raporên Neteweyên Yekbûyî, Parlamenta Ewropayê, Konseya Ewropayê-Dadgeha Mafên Mirovan a Ewropayê û gelek saziyên navneteweyî hatin piştrastkirin.

Di dewama daxuyaniyê de hate gotin, "Dorpêçiya ku ji bo ji nû ve dîzaynkirina herêmê hate kirin, ji bo bigihêje armanca xwe hemû rê û rêbazên hovîtiyê hatin bikaranîn.

Bi mehan bi çekên giran gule û bombe li bajaran hatin barandin, tenê li Cizîrê 292 mirov hatin kuştin ku jin û zarok jî di nav de hebûn. Bi rêya avahiyên TOKÎ, herêmên hatin hilweşandin veguherandin qadeke mezin a ranta înşaetê."

Di daxuyaniyê de hate ragihandin, tenê li navçeya Sûrê di çarçoveya stratejiyên endezyariya etnîkî û civakî de zêdeyî sê sed avahiyên dîrokî hatin hilweşandin û hewl hate dayin ku dîrok û bîra civakê ji holê bên rakirin.

HDP'ê diyar kir, li gel hemû hewldanên hilweşandin, teslîmgirtin, tepisandin û bêdengkirinê jî gelê Kurd îro li ser piyan e û berxwedana xwe ya bi rûmet didomîne.

Di dawiya daxuyaniya HDP'ê de berxwedêr hatin bibîranîn û hate gotin, "Mehmet Tûnç, Asya Yuksel, Pakîze Nayir, Sêvê Demîr, Çekvar Çûbûk, Rozerîn Çûkûr û bi sedan lehengên bê nav ên wê wextê bi gelê xwe re li ber xwe dan, em bi bîr tînin û bi rêzdarî bejna xwe li ber b^rnanîna wan ditewînin. Em ê wan ji bîr nekin, em ê nehêlin ku bên jibîrkirin."