Desteserkirina 24 şaredariyên Kurdan, ku AKP'ê bi rêya qeyûman dest danî ser, li Ewropayê bi çalakiyan hat şermezarkirin.

ZURÎCH

Kurdistanî û dostên wan ên li bajarê Zurîch ê Swîsreyê dijîn, desteserkirina şaredariyên Kurdistanê, ku çeteyên AKP/Qesrê bi zorê dest danîn ser, şermezar kirin.

Çalakiya protestoyî danê êvarê li ber Konsolosxaneya TC a li Zurîchê pêk hat. Tevî nûnerên DEM-KURD, Meclîsa Jinê ya Bêrîtan, ÎDÎF, ÎTÎF, KKP, PYD û Yekîtiya Asûrî-Suryaniyan gelek kes beşdarî çalakiyê bûn.

Nûnerên saziyan li vir axivîn û desteserkirina şaredariyan şermezar kirin. Qisekeran dan xuyakirin, ku ev yek ji nû ve dagirkirina Kurdistanê ye ku ji aliyê Erdogan ve tê kirin û gotin, ew ê li her cihî li dijî vê li ber xwe bidin.

Nûnerê Yekîtiya Asûrî-Suryaniyan got, "Agahiya ku ji Serok Apo hat, kêm be jî em kêfxweş kir. Lê belê ev têrê nake. Heta Serok Apo azad bibe, em ê têkoşîna xwe bidomînin."

Çalakî li dû axaftinan bi qîrîna dirûşme û tilîliyan qediya.

BASEL

Zext û zordariya AKP'ê ku piştî 15'ê Tîrmehê darbeya sivîl kir, li bajarê Basel ê Swîsreyê bi mîtîngekê hat şermezarkirin.

Li ser banga Navenda Civaka Demokratîk a Kurd (NCDK) û Meclîsa Jinê ya Ronahî, Kurdistanî û dostên wan li ber Parlamenta Kantona Baselê li hev civiyan û desteserkirina şaredariyên Kurdistanê şermezar kirin.

Di çalakiyê de ji bo Rêberê Gelê Kurd Abdullah Ocalan dirûşme hatin qîrîn, alên PKK, YPG, YPJ'ê hatin hildan û pankartên bi nivîsa "Dest nede vîna min", "Bimire AKP", "Dîktator Erdogan" hatin vekirin.

Mîtîng piştî xwendina belavoka bi zimanê Elmanî, qediya.

BONN

Desteserkirina şaredariyên Kurdistanê li bajarê Bonn ê Elmanyayê jî hat şermezarkirirn.

Çalakger li ber avahiya saziya çapemeniyê ya Elmanya Deutsche Welle li hev civiyan, wêneyên Ocalan û alên YPG'ê hildan. Çalakgeran bal kişandin ser tecrîda li ser Rêberê Gelê Kurd Abdullah Ocalan û dagirkeriya dewleta Tirk a li Rojavayê Kurdistanê.

Di çalakiyê de dirûşma "Dest nede vîna min" hat qîrîn û dosyayek li ser qirkirin, dagirkirina Rojava û tecrîda li ser Rêberê Gelê Kurd Abdullah Ocalan radestî nûneran hat kirin.

Nûnerên Deutsche Welle jî ragihandin, ku ew ne xerîbê bûyerên li Kurdistan û Tirkiyeyê ne û gotin ew ê vê dosyayê bi hevalên xwe re binirxînin û li gorî wê yekê di bulteneke berfireh de nîşan bidin.

CREÎL

KurdistaniYên li bajarê Creîl ê Fransayê dijîn, ji bo desteserkirina şaredariyên Kurdistanê şermezar bikin meşiyan. Bi sedan kes beşdarî meşê bûn û dirûşmên "Dest nede vîna min", "Bijî Serok Apo" hatin qîrîn.

Komek ji faşîstan xwest meşê provoke bike, lê çalakgeran destûr nedan.