Piştî nexweşiya demdirêj, Helbestvanê Kurdî, Serokê Yekîtiya Nivîskarên Kurdî yên Ermenîstanê, rojnamevan, rêdaktorê rojnemeya ZAGROS’ê Elîxanê Memê koça dawî kir.

Elîxanê Memê, sala 1948, 6’ê meha Çileyê li Komara Ermenîstanê navçeya Aragasotnê, mintiqa Eşterekê, gundê Koşêda ji malbeteke Kurdên Êzidî hatiye dinê. Zarokatiya wî di wî gundî de derbas bûye. Xwendina xwe ya deh salan li dibistana gundê xwe yê Koşêda domandiye.

Piştî dibistanê temam dike, diçe Yêrêvanê Zankoya dewletê fakûltey fîlolojiyê beşa rojnemevaniyê. Sala 1973’yan,  Elîxanê Memê xwendina xwe ya zanîngehê temam dike. Piştre li bajarê Yêrêvanê di rêdaksîyona ''PÎYONÊR KANÇ”, “HAYASTANÎ AŞXATAVORÛHΔ de salên dirêj xebitiye. Paşê derbasî ser xebateke nû dibe û li weşanxaneya ''Xorhrdayîn Grox” çend salan dixebite. Piştre wê ew wek bîbîlografîst li pirtûkxaneya Ermenîstanê ya Neteweyî de kar bike.

Elîxanê Memê ku di nav civaka ermenî de mezin bibû, bi giranî berhemên xwe bi zimanê ermenî dinivîsî û diweşand. Elîxanê Memê hê dema zarok bû, helbestên wî di rojname û kovarên Komarê de dihatine weşandin.

Sala 1983, pirtûka wî ya destana “Kênasî Sov”û ya helbestan ''Kar”, bi zimanê Ermenî ronahî dîtin. Lê sala 2004 û 2009’an pirtûkên wî yên bi navê “Arêvî Yêrkîr (Welatê Rojê)”, “Nûra Zagrosê” bi zimanê ermenî hatin weşandin.

Berhemên Elîxanê Memê bi zimanê dayikê jî hatine weşandin.

Sala 1989, berevoka afirandinên nivîskarên Ermenîstanê ya “Bahara Teze” bi zimanê Kurdî, li Yêrêvanê berhema wî ya “Surra Hisretê” ronahî dît. Sala 2004, dîsa bi zimanê Kurdî destana wî ya “Ax û Nan” û berhema wî ya “Nûranî” ronahî dîtin.

Elîxanê Memê ji sala 1990’î heta îro serokatiya Yekîtiya Nivîskarên Ermenîstanê ya Beşa Kurdî dikir. Ji sala 2007’an heta îro, redaktorê sereke yê rojnameya ZAGROS’ê bû.

Dewleta Ermenîstanê, kar û xebatên Elîxanê Memê bi qîmet dîtiye. Ew hêjayî gelek hurmetname û xelatan dîtine, her wiha Serokkomar Sêrj Sargsyanda jî Elîxanê Memê hêjayî madalyaya payebilind a ''MOVSÊS XORÊNASΔ dîtiye.

Ji bo oxirkirina Elîxanê Memê, tevî malbat û hevalên wî bi sedan kes ji gund û bajarên Ermenîstanê amade bûn. Piştî wecîbeyên olî hatin temamkirin, Elîxanê Memê hat veşartin. Dûvre gel ji bo sersaxiyê derbasî salona ku li gundê Şam Îranê hatî amadekirin bû û li vir têkîldarî jiyana Elîxan axivîn.