Kurdistanî û dostên Îtalyayî, li meydana Porta Venezîa ya li bajarê Mîlano yê Îtalyayê li hev civiyan û heta meydana Caîrolî meşiyan. Di dema meşê de axaftin hatin kirin û komploya navneteweyî hat şermezarkirin.

Zêdeyî 150 sazî tevlî çalakiyê bûn. Meş bi dirûşma "Azadî ji Ocalan re" hat lidarxistin û çalakgeran posterên Ocalan û pankart hildan.

Piştî meşê li meydana Caîrolî mîtîngek hate lidarxistin. Parlamenterên HDP'ê Dîlek Ocalan û Faysal Sariyildiz û parêzer Mahmût Şakar li mîtîngê axivîn.

Qisekeran dan xuyakirin, ku tecrîda giran û bêhiqûqiya li Îmraliyê dewam dike û bang li hemû şoreşger û saziyên demokratîk kirin, ku ji bo azadiya Ocalan bikevin nava liv û tevgerê.

Endamê Konseya Rêveber a KCK'ê Mûstafa Karasû jî bi rêya dîmen peyamek ji çalakiyê re şand.

Di çalakiyê de ku bi hezaran kes amade bûn, tim û tim dirûşmên "Vîva Ocalan" û "Vîva Kurdistan" hatin qîrîn.

Çalakî piştî 5 saetan qediya.