Kurdistaniyên ku li bajarê Manchester ê Îngilîstanê li hev civiyan, Ferzad Kemanger, Şîrîn Elemhulî, Elî Heyderyan û Ferhad Wekîlî ku dewleta Îranê di 9’ê Gulana 2010’an de darve kir, bi girseyî bi bîr anîn.

Bîranîn li qada herî qelebalix ê bajêr ji bo bîranîna Şehîdên Azadiya Kurdistanê bi deqîqeyek rêzgirtinê destpê kir. Di bîranînê de gelek caran dirûşmeyên “Şehîd Namirin”, “Jin Jiyan Azadî”, “Darvekirinan rawestînin” hatin berzkirin û wêneyên girtiyên siyasî yên Kurd ku ji aliyê dewleta Îranê ve hatin darvekirin, alên Partiya Jiyana Azad a Kurdistanê (PJAK) û flamaya wêneyê Rêber Apo li ser bû hatin hilgirtin.

Di bîranînê de Endamên PJAK’ê Zerdeşt Hewramanî, Şexawan û li ser navê Meclîsa Gel a Kurd Mizgîn Nemîr axivîn.

Di axaftinan de kongreya 12’emîn a PKK’ê hate silavkirin û wiha hate gotin: “Ev ne dawî destpêkek e. Înkar hate hilweşandin, niha em bi ruhê kongreya 12’emîn ku li ser bingeha paradîgmaya Rêber Apo pêk hat ber bi azadiyê ve dimeşin.”

EM Ê RÊYA WAN BIDOMÎNIN

Di axaftinan de hate diyarkirin ku PJAK’ê di 15’emîn salvegera darvekirina Ferzad Kemanger, Şîrîn Elemhulî, Elî Heyderyan û Ferhad Wekîlî de wan bi rêzdarî û bi rûmet bi bîr tîne û wiha hate gotin: “Ji bo her kesên ku di lêgerîna azadiyê de ne û bawerî bi demokrasiyê tînin, rêya têkoşînê ronî kirin.”

Di berdewamiya axaftinan de hate gotin ku meha Gulanê ji bo Tevgera Azadiya Kurd meha şehîdan û berxwedana lehengane ye û wiha hate gotin: “Îro mîratgirên rastîn ên vê têkoşînê qehremanên wekî Hakî Karer, Mehmet Karasungur, Îbrahîm Bîlgîn, Halîl Çavgun û Mizgîn (Gurbet Aydin) in. Hevrêyên me yên hêja ji bo azadiya gelê Kurd ê li Îranê û komên din ên bindest têkoşiyan û vê mîrateya bi rûmet berdewam kirin.”

Bi berdewamî wiha hate gotin: “Em careke  din şehîdên 9’ê Gulanê bi bîr tînin û em soz didin ku heta hemû gel azad bibin rêya wan bidomînin.”

Piştî axaftinan li qadan danezan hatin belavkirin û bi çepik û dirûşmeyan careke din darvekirin hatin protestokirin.