Girtîgeha Tîpa T ya Tarsûsê ya jinan berî 3 mehan hate vekirin û ji roja destpêkê ve zext û zordariyê dest pê kir. Leşker û gardiyanan dest bi lêdanê kirni. Girtiyên jin gotin, "Li vir şîdetek mezin heye. Dengê me bibihîzin." Greva birçîbûnê ya bêdem û bê dorveger a girtiyan jî kete roja 29'an.

Şaxên ÎHD'ê yên Edene û Mersînê raporek amade kirin û diyar kirin ku girtiyên jin yek bi yek ji wesayîtê hatine derxistin û ji girtiyan re gotine ku li pêşberî midûr û fermandarê jendermeyan bêjin "em teslîm bûne" û yên wisa negotine jî şîdeteke tund li wan hatiye kirin, li erdê hatine dirêjkirin, bi porê wan girtine û ew erdê re şa kirine.

Mahmût Çaçan ku weke midûr tayînê girtîgeha Tîpa T ya Tarsûsê hatiye kirin, 24'ê Îlona 1996'an de li Amedê 11 girtiyên ji doza PKK'ê bi hesin û daran qetil kiribû. Der barê Çaçan de wê demê doz hat vekirin lê doz ket ber demboriyê.

ÇALAKIYA GREVA BIRÇÎBÛNÊ

Di 8'ê Tebaxê de 52 jinên girtîgeha Tîpa T a Tarsûsê li dijî êşkenceyê dest bi greva birçîbûnê ya 5 rojan kirin.  Di roja sêyemîn ya grevê de girtiyan 12 xal  pêşkêş kirin û gotin heta daxwazên wan neyên cih wê dest ji grevê bernedin.

 12 daxwazên girtiyên jin wiha ne:

*Kesên êşkence kirine bikevin ber lêpirsînê û werin darizandin.

*Pêşnûme qanûna der barê kincê ji yek tîpî  de bê kişandin.

*Girtiyên nexweş bila bên dermankirin, sewqî nexweşxaneyan bêkirin.

*Bila dawî li lêgerînên li nava qewîşan ên wek tacîzê bê anîn.

*Di hevdîtinên girtî de her kes bi numareya T.C'ê dikare hevdîtinê bike. Ev pergaleke teknîke. Divê dawî li vê bê anîn.

 *Divê dawî li cezayên dîsîplîn û hucreyê bê anîn.

*Divê nûneriyên me yên ji du kesan pêk tên bê qebûlkirin û îdareya girtîgehê ji diyalogê re vekiribe.

 *Divê aktîvîteyên hobî û sporê bên pêkanîn.

*Divê postaya hundir û derve bê qebûlkirin.

*Ji bo gilîkirinê pulên postayê tê xwestin. Serlêdan tê astengkirin. Daxwazanmeyên me yên serlêdanê nayên dayin. Divê ev rewş ji holê bê rakirin.

*Divê şert û mercên fîzîkî yên girtîgehan bên sererastkirin.

 *Alav tên desteserkirin. Divê alav şûnde bên dayîn.

Greva birçîbûnê ya bêdem û dorneveger ya girtiyên jin, bi banga "Li vir şîdet û zextek mezin heye, dengê me bibihîzin" berdewam dike.