Fermandariya Giştî ya Yekîneyên Parastina Jinê (YPJ) têkildarî şehîdbûna 3 şervanan daxuyaniyeke nivîskî da. Berfirehiya daxuyaniyê wiha ye:

"Şervanên me Berfîn Çem, Ahîn Dilgeş û Silav Ocalan di eniyên berxwedana li dijî êrişên çeteyên dewleta dagirker a Tirk de, tev li karwanê nemiran bûn.

Şervanên YPJ’ê Arjîn Mihemed Elî bi nasnav Berfîn Çem, Şehnaz Hemo bi nasnav Ahîn Dilgeş û Zeyneb Hemze bi nasnav Silav Ocalan di berxwedana dîrokî ya li dijî çeteyên ser bi dewleta faşîst û dagirker a Tirkiyeyê, bi qehremanî şer kirin, di dîrokên cuda de şehîd bûn. Em hevrêyên xwe yên şehîd, bi rêzdarî û minetdarî bi bîr tînin, ji malbatên wan yên welatperwer û hemû gelên xwe û tevahiya hevrêyên wan yên têkoşînê re sersaxî dixwazin.

Çeteyên girêdayî dewleta Tirk a dagirker di 28’ê Mijdarê hemwext ku êrişê herêmên li jêr hakimiyeta rejîma Bees ya Sûriyê kirin, herwiha li beramberî Bakur Rojhilatê Sûriyeyê jî bi giranî êriş dane destpêkirin. Li beramberî vê, şervanên azadiyê berxwe dan û darbeyên giran li çeteyan xist. Ev berxwedana bê emsal bi ruheke fedayî û îdeayeke mezin ya serketinê bênavber didome.

Çeteyên ser bi dewleta dagirker a Tirkiyê bi van êrişan Şoreşa jinê û destkeftiyên jinan dikin hedef. Li beramberî vê yekê jî şervanên YPJ ji berxwedana li eniyan re bi vê zanebûnê pêşengtiyê dikin. Rol û mîsyoneke girîng dileyîzin û xeyalên dagirker û çeteyan di qirika wan de dihêlin. Her yek ji hevrêyên me ku li eniyan e, li dijî zîhniyeta desthilatdariya zilam ya ku di rastiya çeteyan de bi awayeke hovane derdikeve holê, bi felsefeya ‘Jin, Jiyan, Azadî’ xwe tev lê dikin û rê nadin çeteyan ku herêmên azad yên Bakur Rojhilatê Sûriyeyê dagir û talan bikin. Bi vê armanca pîroz jî şervanên me berdêlên giranbuha didin. Hevrêyên me Berfîn Çem, Ahîn Dilgeş û Silav Ocalan jî bi vê perspektîfa dîrokî nêzîk bûn û xwe bi wêrekiya jina azad û zane araste kirin û şer kirin. Ew li eniyên pêş ên têkoşînê bûne îfadeya jina serhildêr û têkoşer.

Hevrêya me Berfîn Çem li bajarê ku ji hemû cîhanê re bûye sembola berxwedanê Kobanê çavên xwe li cîhanê vekir. Di malbateke welatparêz bi çanda Kurdperwerî mezin bû. Wek ciwanekê jiyana jirêzê û normal nepejirand, li ser vê bingehê xwe bi zanebûna niştîmanî zane kir.

Di demeke kin de xwe li ser bingeha hunera şer û artêşbûna jinan perwerde kir û bû şervaneke jêhatî ya têkoşînê.

Hevrêya me Berfîn Çem bi dilnizimî û rûgeşiya xwe hate nasîn, xwe bi hemû hevalên xwe da hezkirin û şopeke xurt di têkoşînê de hişt. Wê di oxira welat û jiyana azad de xwe bêyî dudilî feda kir û navê xwe di rûpelên zêrîn yê dîrokê de mayînde nivîsand.

Hevrêya me Ahîn Dilgeş jî ji bajarê Kobanê hate cîhanê. Di zarokîniya xwe de têkoşîna azadiyê nasî û şervantiya YPJ xeyalên wê xemiland. Wê da pey xeyalên xwe û beşdarî nava refên YPJ’ê bû. Her ku rastiya artêşbûna jina azad naskir, hêz û îradeya xwe xurtir kir û bi zanebûneke kûrtir jiyan û têkoşîn bi dest girt. Di malbata wê de tevlîbûn hebû û ew jî li pey şopa şehîdên xwe meşiya. Hezkirin û zanebûna xwe ya welatparêzî bi pîvanên azadiya jinê û dîsîplîna leşkerî re kire yek û wiha jî di demeke kin de karî berspirsyarî rake û di warê erka parastinê de xwe pispor bike.

Her ku dewleta dagirker ya Tirkiyê û çeteyên wî li beramberî bakur-rojhilatê Sûriyê êriş pêk dianîn, di wê de hêrs û kîneke mezin ya tolhildanê ava dikir. Ji ber nedikarî ku trajediyên heyî li herêmê ji nedîtî were. Êriş û xeteriyên li ser herêmê û şoreşa jinê dijwar bûn, vê rastiyê jî di wê de zanebûna ku xwe bi lez ava bike û bi amadekariyeke xurt pêşî li êrişan bigire, pêşxist.

Hevrêya me Silav Ocalan ji bajarê çanda welatparêziyê Efrînê ji dayîk bû. Bi çanda hezkirina welat û axê mezin bû. Malbata wê di salên ku têkoşîna netewî li Rojava geş bû, deriyê mala xwe ji şoreşgeran re vekir û zarokên xwe jî li ser bingeha çand û exlaqa kurdperwerî perwerde kir. Ji malbata hevrêya me Silav Ocalan beşdarî di nav refên YPJ û QSD jî pir e. Di vê wateyê de hevrêya me Silava bi têgihaştina parastinê mezin bû. Wê jî wek her ciwanekê ku xwe li ber civaka xwe berpirs dibîne, li dijî êriş û dagirkeriyên dijmin bû xwedî hêrs û bertek û bi van hestan jî tev li nava YPJ’ê bû. Karî ku di branşa çekên giran de xwe bi pisporî amade bike û dema ku li eniyên berxwedanê êrişên dijwar ên çeteyan dest pê kir, ji bo ku roleke aktîf di nava şer de bilîze, beşdarî eniyên şer bû.

Hevrêya me Silav Ocalan dixwest ku bibe xwedî kesayeteke milîtaniya jinê. Ev armanc jî di wê de hêzeke mezin ya xwe guhertinê da çêkirin. Wiha jî karî bi awayî herî baş xwe birêxistin bike. Wê jî ruhê şervantiya YPJ bi awayeke bitûnî di xwe de afirand û bû nûnereke rast ya jina ku xwedî li nirxên civaka xwe derdikeve, komînal jiyan dike û di rêya sosyalîzma civaka demokratîk de xwe feda dike.

Em dubare hevrêyên xwe bi bîr tînin û didin diyarkirin ku emê ti êrişekê bêbersiv nehêlin û tola yek bi yek şehîdên xwe bi têkbirina dagirkerî û misogerkirina pergala neteweya demokratîk hilînin.

Em ji gelên xwe jî dixwazin ku di van rojên şerên giran de, girêdayî bîranîna şehîdên xwe, li kêleka zarokên xwe yên leheng bisekinin û bi feraseta şerê gel ê şoreşgerî têkoşîn bikin.”

NASNAMEYÊN ŞEHÎDAN

Li gorî daxuyaniyê agahiyên li ser nasnameya şehîdan bi vî rengî ne:

Nav û Paşnav: Arjîn Mihemed Elî
Nasnav: Berfîn Çem
Navê Dayik: Ferîde
Navê Bav: Hemed
Dîroka Şehadetê: 01.12.2024

Nav û Paşnav: Şehnaz Hemo
Nasnav: Ahîn Dilgeş
Navê Dayik: Xezal
Navê Bav: Adil
Dîroka Şehadetê: 03.12.2024

Nav û Paşnav: Zeyneb Hemze
Nasnav: Silav Ocalan
Navê Dayik: Emîne
Navê Bav: Cuma
Dîroka Şehadetê: 07.12.2024