Çalakiyên protestoyî yên li dijî rejîma Îranê dewam dikin, ku 4'ê Îlonê li bajarê Banê yê Rojhilatê Kurdistanê kolberên bi navê Qadir Behramî (41) û Heyder Ferecî (21) ji aliyê hêzên rejîmê ve hatibûn kuştin. Gelê Qendîlê piştgirî da gelê Rojhilatê Kurdistanê.

Şêniyên Qendîlê ji ANF'ê re axivîn û bang li hemû Kurdan kir, ku nerazîbûnê nîşanî rejîma Îranê bidin û rabin ser piyan.

Zozik Cemal a ji Rewandizê di destpêkê de bal kişand ser girîngiya nîşandana helwesta zelal a gelê Kurd. Cemal ji Neteweyên Yekbûyî û saziyên navneteweyî xwest, ku bes bêdeng bimînin û destnîşan kir, ku ev meseleyeke tenê herêmekê nîne.

BI RENGEKÎ RÊK Û PÊK TÊN KUŞTIN

Govar Mahmûd ê ji Ranyayê destnîşan kir, ku ew bi gelê Rojhilat re ye û got, "Rejîma Îranê, çavkaniyên aboriyê û standartên jiyanê yên gel ji her alî ve diçikîne, tine dike. Gel ji bo jiyana xwe bidomîne, neçar tê hiştin ku di nava van şert û mercan de bixebite. Tevî vê yekê jî rejîma Îranê bi rengekî rêk û pêş mirovên vî gelî dikuje. Ev yek zilmeke eşkere ye. Serhildana li dijî vê yekê, encam e. Mafdar e û rewa ye."

WEZÎFEYA NETEWEYÎ Û ÎNSANÎ

Rewez Mûhammed jî rejîma Îranê şermezar kir, ji ber ku kolberan dikuje û êrîşî çalakgerên protestoyî dike. Mûhammed got, piştgiriya ji bo gelê Rojhilat wezîfeyeke însanî û neteweyî ye.

BÊDENGÎ DIBE SEDEM KU ZILM ZÊDE BIBE

Zîlan Rojhilat işaret bi girîngiya piştgirî û xurtkirina serhildana gelê Rojhilatê Kurdistanê kir û got, "Ji ber ku rejîma Îranê sîstemeke welê ye, ku bêdengî li pêşberî zilmê çiqasî hebe, ewqasî jî şîdeta xwe zêde dike."

Bêrîvan Zîlan ku ciwanek ji Rojhilat e bang li Kurdan kir ku li hemberî vê zilmê bibin yek û dawî li komkujiyan bînin.

Behre Omer jî ji gelê Rojhilat re got, "Gelê Qendîlê bi we re ye."