Li Zozanên Hasandinê yên navçeya Pasûr a Amedê lêgerînên madenê hatin destpêkirin. Maden, dê bandorê li gundên Nêrçik, Şînas, Dimiliyan, Hêlin, Beyrok û Înîkayê bike. Bi hezaran welatî li dijî lêgerîna madenan meş li dar xistin. Girseya ku li pêşiya Tubeya Hazir Baba hatin gel hev û bi dovîzên “Dest nedin jiyana xwezayî”, “Jiyana ekolojîk bi pereyan nayê firotin” û bi dirûşmên “Dest nedin xwezaya me” û “Destên dirêjî zozanên me bila bişikên” meş hat lidarxistin. Meş, heta cihê ku gundî weke Meydan pênase dikin berdewam kir. Hevşaredarê Pasûrê Mûrad Îpek, Baroya Amedê û şaxên odeyên Amedê yên girêdayî TMMOB’ê tevlîbûn. Meş, bi qasî 3 km’an dom kir û piştre daxuyanî hate dayîn.

Ji şêniyên herêmê Ayten Çelîk di daxuyaniyê de axivî û wiha got: “Ev der axa me ye. Em van deran nadin şîrketan. Em ê li dijî vê li ber xwe bidin. Em ê li dijî vê bisekinin. Em ê dev ji xak û zozanên xwe bernedin.” 

Şêniya bi nave Sidika Aslan jî wiha got: “Em ji bo ax û jiyana xwe hatin vê derê. Em ji bo parastina mafê xwe hatin. Em mal û milkê xwe ji wan re nahêlin. Em naxwazin ev şîrket bên vê derê. Bila kesên biyanî neyên axa me dagir bikin. Dê ava me ziwa bikin û jiyana me tune bikin. Em vê naxwazin.”

Nevîn Emre jî got ku zêdetirî 20 sal in li herêmê şivantiyê dike û ev tişt anî ziman: “Hasandin mîna qazanê ye. Hem xelk ava vexwarinê jê digire hem jî ji bo avdanê. Em dev ji welat, xak û ava xwe bernadin. Em ê doza xwe bernedin.”

Li ser navê Baroya Amedê Resûl Almastaş axivî û wiha got: “Baroya me dê li dijî vê binpêkirina maf bisekine û têkoşîna li dijî rantê mezin bike. Em ê tevî xelkê herêmê pêvajoya hiqûqî bişopînin. Projeyeke ku dê 7 tax û mezrayan texrîb bike nayê qebûlkirin. Weke baro dê piştevaniya me bi gelê herêmê re bidome.”

Li ser navê Lijneya Koordînasyona TMMOB’ê ya Amedê Mûrat Sari jî wiha got: “Em bi gelê xwe re ne. Kana madenê ne ji bo feydeya gel e. Dê zirarê bide dewlemendiya axê û avên sererd û binerd. Em ê pêvajoya ÇED’ê bişopînin û bi gelê xwe re bin.”

Ji Komeleya Ekolojiyê Necdet Sezgîn jî ev tişt anî ziman: “Em ê li vir lêkolînê bikin û em ê bibînin bê ka kesên dixwazin madenê çêbikin dê çi zirarê bidin me. Em ê bi gelê xwe re bin. Em spasiya gelê xwe dikin ku xwedî li xweza, çand, ax û nasnameya xwe derdikevin. Weke komeleyan ji bo li vir maden neyên vekirin a ji destê me tê em ê bikin.”

Di daxuyaniya bi navê keyayên gundan hatiye xwendin de jî hat gotin ku ew naxwazin li herêmê lêgerîna madenan bê kirin û navendên madenan bên avakirin.