Ji bo kesên ku di “qedexeyea derketina derve” ya 2’ê Kanûna 2015’an li navçeya Sûrê ya Amedê de jiyana xwe ji dest dabûn, hatin bibîranî û mewlûd hate xwendin. Mewlûd li Salona Kaplan City ya li semta Gazîler a Amedê pêk hat. Hevserokên KCD’ê Leyla Guven û Berdan Ozturk, Parlamentera Şirnexê ya HDP’yî Leyla Bîrlîk, Hevserokê Giştî yê DBP’ê Mehmet Arslan, rêveberên HDP’ê û DBP’ê yên bajar û navçeyên Amedê, Dayikên Aştiyê û bi sedan kes beşdarî bîranîn û mewlûdê bûn. Mewlûd bi kurdî hat xwendin û ji bo bîranîna kesên di têkoşîna azadî û demokrasiyê de jiyana xwe ji dest dane rêz hat girtin. Sînevziyona ji bo bîranîna kesên li Sûrê jiyana xwe ji dest dane hat pêşandan.

‘EM Ê VAN ROJÊN ZOR Û DIJWAR DERBAS BIKIN’

Hevseroka MEYA-DER’ê ya bi Biryarnameyên di Hikmê Qanûnan de (BHQ) hat girtin Ayşe Dîcle axivî û diyar kir ku nahêlin kesên jiyana xwe ji dest dane di gorên xwe de jî rehet rakevin û got: “Em ê van rojên zor û dijwar derbas bikin.”

‘BI SAYA OCALAN KURDAN ÇONG NE DANÎ’

Pişt re Hevserokê KCD’ê Berdan Ozturk jî axivî û destnîşan kir ku gelê kurd ku bi dehan salin bedelên giran dide êdî ne kurdên berê ne û got: “Ji şewitandina gundan bigire heta hilweşandina bajarên dîrokî, polîtakaya dewletê ya ku xwest kurd serê xwe bitewînin bi ser neket Kurd li ser piya ne û têkoşîna xwe didin meşandin. Elbet ev jî encama raman û bîrdoziya birêz Abdullah Ocalan e. Felsefeya wî nirxê bi hev re jiyankirina gelan e.”

‘SAKÎNE Û SÊVÊ YAN HATIN BIBÎRANÎN’

Ji Meclîsa Dayikên Aştiyê Makbule Ozbey jî jinên di têkoşîna azadî û demokrasiyê ji bo gelan de jiyana xwe ji dest dane bibîr anî û got: “Mafê me yê herî bingehîn ew e ku em ê zarokên me yên mafê me parastine ji bîr nekin.”

Piştî dayîna xwarinê mewlûd bi dawî bû.