Dewleta Îranê di 28’ê Îlonê de li herêma Zirgiwê ya nêzî bajarê Silêmaniyê û li navçeya Koyê êrîşî baregehên hêzên Rojhilatê Kurdistanê kir. Di van êrîşan de kesên sivîl jî bûn hedef. Li gorî daxuyaniya fermî herî kêm 9 kes hatine qetilkirin û 32 kes jî birîndar bûne.

Hewldana Tifaqa Kurdistanî bi daxuyaniyeke nivîskî ev êrîş şermezar kir. Di tifaqê de KCD, DBP, HDP, DDKD, KDP-T, KDP-BAKUR, KKP, PÎA û Partiya Azad hene.

Di daxuyaniyê de êrîş hate şermezarkirin  û ev tişt hate diyarkirin: “Bi kuştina Jîna Mahsa Amînî re li her dera welat protestoyên demokratîk û sivîl hatin lidarxistin û rejîm bi êrîşan dixwaze van xwepêşandanan bide sekinandin. Vê berxwedana sivîl bi pêşengî û berxwedana jinan pêk hatin û li her dera dinyayê piştgiriya wê hate kirin. Li hemberî vê berxwedanê rejîma Îranê jî hêrsa xwe zêde dike û êrîşî Rêveberiya Herêmî ya Kurdistanê dike.

Ji aliyekî ve Îran êrîşî herêma Kurdistanê dike û ji aliyê din ve jî Tirkiye êrîşî Başûr û Rojava dike. Li hemberî van êrîşan divê partiyên siyasî yên Kurdan yekîtî û helwesta xwe ya hevpar diyar bikin.

Em Tifaqa Kurdistanî van êrîşan bi tundî şermezar dikin û bang dikin ku bila ev êrîş werin sekinandin. Em bang li hikumeta Iraqê, Rêveberiya Herêmî ya Kurdistanê, Neteweyên Yekbûyî, Yekîtiya Ereban û saziyên herêmî û navneteweyî dikin ku li hemberî van êrîşan berpirsyariya xwe bi cih bînin. Em ji malbatên cangoriyan re sersaxiyê û ji birîndaran re jî şifaya xêrê dixwazin.”