Ji Fermandarên HPG'ê Serhat Jiyan Patnos di çarçoveya Pêngava Şehîd Rizgar Gever û Şehîd Medya Mawa de ya li herêma Botanê têkoşîna gerîla ya sala 2019'an nirxand.

Patnos got, "Botan warê şoreşa Kurdistanê ye. Gerîlatiya li devereke mîna Botanê ji bo me cihê rûmetê ye. Qada Botanê Egîd, Azîme, Nûda, Ferhat û gelek fermandarên mezin afirand. Têkoşîna li qadeke bi vî rengî, meşa li ser şopa şehîdên leheng ên mezin gelekî bi wate ye û daxwaza me ya ji bo têkoşînê mezintir dike."

'GERÎLA DERB LI OPERASYONÊN QIRKIRINÊ XIST'

Patnos der barê operasyonên qirkirinê yên artêşa Tirk ên sala 2019'an û bersiva gerîla got, "Dijmin her tim dixwaze ku li herêma Botanê gerîlayên Botanê tasfiye bike. Di nava sala 2018'an de şefê faşîst û barbar, Wezîrê Karên Hundir ê Tirkiyeyê digot, 'Di sala 2018'an de em ê gerîla li qada Botanê biqedînin. Em ê tasfiye bikin, yên mayî jî wê ji birçîbûnê û sermayê tasfiye bibin'.

Bêguman ev yek pêk nehat, gerîlayên Kurdistanê di nava şert û mercên gelekî giran de bi îradeyeke mezin bi berxwedaneke ji ya sala 2018'an mezintir dest bi sala 2019'an kirin. Tifaqa AKP-MHP'ê ku di sala 2019'an de fêhm kirin bi ser neketine li vê yekê mikur hat; 'Me neqedand, lê belê ji aliyê çalakiyan ve me bêbandor kir'. Bi bihara 2019'an re artêşa Tirk a dagirker ji Gabarê heta Cûdî, ji Cûdî heta Bestayê, Kela Memê û Katoyan, bi gelek navan operasyon kir. Bi taybetî li herêma Bestayê operasyon qet bi dawî nebûn. Gerîla di van operasyonan de bêyî ku windahiyan bidin derbên mezin li artêşa Tirk xistin."

GERÎLAYÊN KURDISTANÊ RASTIYEKE KU BERÊ XWE LI SERKETINÊ YE

Li ser rêbaza şer û asta moralê ya gerîlayên Botanê jî Patnos got, "Li devera ku rêxistinbûn, coş û kelecana partîbûnê heye, moralê gerîla jî bilind e. Gerîla bi asta bilind a moral û motîvasyonê derbên mezin li dijmin dixin. Artêşa dagirker a Tirkiyeyê qereqolên xwe dike mîna kelehan, bi taybetî sîstema xwe ya binê erdê xurt dike. Vê yekê jî ji tirsa gerîla dike.

Di medyayê de welê nîşan didin ku operasyonên wan encaman bi xwe re tînin. Lê belê derketina artêşê ya operasyonê ji bo gerîla ti carî nebûye dezavantaj, berevajî her tim ji bo gerîla bûye avantaj. Operasyon ji bo gerîla dibe firsendeke mezin ku li hedefa xwe bixin. Gerîla her tim bi ruhê serketinê bi ser artêşa Tirk a dagirker ve diçe û derbên mezin lêdixe."

ÎSTÎXBARATA ARTÊŞA TIRK HATE TÊKBIRIN

Patnos rêbaz û taktîka gerîla ya di çarçoveya projeya ji nû ve avabûnê jî nirxand û got, "Li her eyaleta ku projeya ji nû ve avabûnê kete dewrê derbên mezin li dijmin hatin xistin. Hêzeke dijmin nîne ku xwe li ber rêbaz û taktîka rast a gerîla rabigire. Di çarçoveya projeya ji nû ve avabûnê ya gerîla de teknîk û îstîxbarata artêşa Tirk a dagirker ku gelekî pê bawer bû têk çû."

Fermandar Patnos destnîşan kir, çawa ku fîşeka destpêkê li Botanê hate teqandin, ew bi îdîa û biryardar in ku di sala 2020'î de jî derbên serketinê bi pêşengiya qada Botanê li hêzên dijmin bixin.