Zanayê Kurd Mûsa Anter di salvegera 25’emîn a qetilkirina xwe de li ser gora xwe ya li Stîlilê ya Nisêbînê hate bibîranîn. Malbata Anter, Parlementerê HDP’ê yê Mêrdînê Alî Atalan û rêxistinên navçe û bajar ên HDP û DBP’ê beşdarî bibîranînê bûn.

Beriya bibîranînê leşkeran bi wesayîtên zirxî rêya gund girtin û nehiştin gel biçin gund. Tenê ji bo parlementer û xizmên malbatê destûr dan.

Parlementerê HDP’ê yê Mêrdînê Alî Atalan di bibîranînê de axivî û got, “Em ê ne têkoşîna wî û ne jî wî ji bîr bikin. Em ê heta dawiyê mîrata wî bilindtir bikin. Heta ku ev gel azad bibe wê ev têkoşîn bidome.”

Hevberdevkê Înîsayatîfa Rojnamevanên Azad Hakki Boltan jî Anter û xebatkarên çapemeniya azad yên jiyana xwe ji dest dane bi bîr anî û got: “Apê Mûsa lêkolînerek heqîqetê bû. Heta roja hat qetilkirin jî têkoşîna heqîqetê dida. Em ê wek berdewama Apê Mûsayan vê têkoşînê bidomînin.”

Herî dawî kurê Apê Mûsa, Dîcle Anter axivî û wiha got: “Çariyek sedsal derbas bû lê hêj kujerên bavê min dernexistine holê û bûyer zelal nebûye. Tiştên Apê Musa dinivîsand digot îro carek din tên dubare kirin. Şagirtên wî jî hatin qetilkirin û diavêjin girtîgehan. Wê ev tişt wisa nemeşe.”