HDP’ê li Wanê mîtîngek li dar xistin. Ji destê sibehê ve gel berê xwe da qada mîtîngê.

Hevserokên HDP’ê yên Wanê Yadîşen Karabûlak û Umît Dede, Hevserokên DBP’ê yên bajêr Ayla Tarhan û Okkeş Kawa, parlementera HDP’ê ya Wanê Mûazzez Orhan, namzetên hevşaredariya bajarê mezin a Wanê Bedîa Ozgokçe Ertan û Mûstafa Avci, namzetên hevşaredariyê yên navçeyan, nûnerên KCD’ê û çalakgerên TJA’yê tevlî mîtîngê bûn.

Ji bo piştgiriya grevên birçîbûnê  2 deqîqeyan çalakiya bêdengiyê hate kirin.

DEDE: ME DAYÎKA TAYBET JI BÎR NEKIR

Hevserokê HDP’ê yê Wanê Umît Dede di destpêkirina mîtîngê de axivî û got ku “Me Dayîka Taybet û Roboskî ji bîr nekir. Divê tecrîda li ser Ocalan were rakirin, heke tecrîd were rakirin wê aramî were Tirkiyeyê.”

Namzeta hevşaredariyê ya bajarê mezin a Wanê Bedîa Ozgokçe jî bi silavkirina siyasetmedarên girtî dest bi axaftina xwe kir û got ku “Di 31’ê Adarê de em ê ji xespa qeyûm re bibêjin êdî bes e. Di 31’ê Adarê de em ê bersivê bidin Erdogan.”

Namzetê hevşaredariyê ya bajarê mezin a Wanê Mûstafa Avci jî diyar kir ku di 31’ê Adarê de wê gelê Wanê hemû qirêjiyên desthilatdariyê paqij bike.

Peyama hevşaredarê bajarê mezin a Wanê Bekîr Kaya jî di mîtîngê de hate xwendin.

ÛCAR: EM Ê TECRÎDÊ BIŞKÎNIN Û FAŞÎZMÊ HILWEŞÎNIN

Parlementera HDP’ê ya Êlihê Feleknas Ûca jî diyar kir ku gelê Wanê ji niha ve serkeftina di 31’ê Adarê de daye û got ku “Gelê me li hemberî zext, girtin û kuştin û qetlîaman stûyê xwe xwar nekir. Parlementerên me Leyla Guven, Tayyip Temel, Mûrat Sarisaç û Dêrsim Dag îro li Amedê di greva birçîbûnê de ne. Daxwazên wan, daxwazên me ne. 8 sal in rêzdar Ocalan nikare bi parêzerên xwe re bicive. Ocalan di bin tecrîdeke giran de ye. Di nava hefteyekê de 5 şehadet pêk hatin. Berpirsê van şehadetan dewlet e. Em ê tecrîdê bişkînin û faşîzmê hilweşînin.”

Mîtîng bi konserê bi dawî bû.