Li Miftîxaneya Wanê piştî ku bi sedan kes ji kar hatibûn derxistin, derket holê ku ev pêvajo awayekî bêhiqûq hatiye kirin.

Pêvajoya çavdêrî û şahidiya veşartî ya li ser meleyan bi daxwaza Serokatiya Desteya Teftîşê ya Serokatiya Karên Diyanê û Sermufettîşiyê hatibû destpêkirin.

Miftiyê Wanê navê meleyan daye û xwestiye ku ev mele werin şopandin. Miftîxaneya Wanê hin mele ji bo vî karî peywirdar kiriye.

Belgeyek derket holê ku divê nasnameya şahidên veşartî neyê eşkerekirin û dewlet wan biparêze. Ev meleyên veşartî, meleyên ku hatine îxraçkirin bi hinceta ku têkiliya wan bi PKK’ê re heye, sûcdariyan dikin.

Di îfadeya ‘mûxbîr’ekî de ev tişt hatiye diyarkirin: “Ev kes, sempatîzanê PKK û KCK’ê ye. Ev kes piştgiriyê didin PKK’ê. Tevlî cenazeyên endamên PKK’ê dibin. Di dema Kobanê de alîkarî dan PKK’ê. Îxracbûna wan biryareke baş e. Di cenaze û şînan de propagandaya PKK’ê dikin. Ez dixwazim nasnameya min veşartî bimîne û neyê eşkerekirin. Ji ber ku ez baweriyê bi dewletê tînim, min ev îfade da. Ji ber ku ez dizanim wê dewlet min û zarokên min mexdûr neke.”

Li Wanê herî kêm 21 mele ji ber van îfadeyên veşartî ji kar hatibûn derxistin.