Dewleta Tirk li pey wê yekê ye ku bi rêya artêşa xwe, dagirkeriya xwe ya li herêma Bradostê ya Başûrê Kurdistanê mayinde bike. Gerîlayên HPG û YJA Starê jî bi çalakiyên xurt û bi tesîr nahêlin bêhn bê ber leşkerên Tirk.

Çalakiyên gerîla yên li dijî hêzên dagirker bi taybetî li girê Lêlîkanê dewam dike.

Li gorî agahiyên ji herêmê hatin girtin, gerîlayên HPG û YJA Starê, îro saet 10'an li dijî leşkerên Tirk ên li ser girê Lêlîkanê ji 8 aliyan ve çalakiyeke mezin kirin.

Çavkaniyan ragihandin ku gerîla di çalakiyê de ji 6 aliyan ve bi çekên ferdî, nîv otomatîk û karnasê derbên giran li leşkerên Tirk xistin.

Hêzên gerîla her wiha ji 2 baskan ve jî bi çekên giran li çeperên leşkerên Tirk dan.

Li ser hejmara leşkerên Tirk ên mirî û birîndar agahiyeke zelal bi dest neket. Tê payin ku HPG li ser çalakiyê di nava rojê de daxuyaniyekê bide.