Malbatên Êzidî yên li gundê Kelhoka Bişêriya Êlihê di salên 1990’î de ji ber zext û şer, erdên xwe dabûn rûspiyên malbatên Karabûlût û Bîter. Êzidiyan di noterê de erdê xwe emanetî van kesan kiribûn û neçar mabûn ku koçî Ewropayê bikin. Malbatên Êzidî piştî 20 salan vegeriyan û dîtin ku erdên wan hatine desteserkirin.

Malbat ji bo ku dîsa erdên xwe bi dest bixin doz vekiribûn. Piştî têkoşîna hiqûqî ya 8 salan malbatan erdên xwe bi dest xistin.

Lê malbatên Bîter û Karabûlût gelek caran êrîşî malbatên Êzidî kirin. Malbatên Êzidî îro jî dema ji otelê derketin 6 kesan êrîşî wan kirin.

Li gorî agahiyan komekê bi daran êrîşî malbatan kirine. Di vê êrîşê de Nedîm Erkîş ê ku li Kelhokê erdê wî heye û Cevdet Tûkû yê ku ji bo şînê hatibû bajêr, birîndar bûne.

Piştî êrîşê 6 êrîşkar hatin destgîrkirin. Hate hînbûn ku tendirustiya Erkîş û Tûkû baş e.