Heyeta KNK'ê ku ji Alîkarê Hevserokan Tahir Kemalîzade, endamên Dîwana KNK'ê Dr. Kamûran Berwarî û Perwîn Ezîzî, endamên KNK'ê Seyîd Ekrem û Ferhat Dostkî pêk tê, li Navenda Giştî ya Tevgera Azadî ji aliyê Hevserok Mihemed Ebdullah û endamên tevgerê Dr. Bekir Mecît, Bêrîvan Mihemed, Dara Hisên û Wahap Ehmed ve hate pêşwazîkirin.

Hevdîtina ku li çapemeniyê girtî pêk hat, bi qasî saet û nîvekê dewam kir. Piştre daxuyaniyek ji çapemeniyê re hate dayin. Hevserokê Tevgera Azadî Mihemed Ebdullah diyar kir, ku KNK'ê di pêvajoyeke dîrokî ya girîng de bi erk û wezîfeyeke girîng radibe. Ebdullah anî ziman, Tevgera Azadî amade ye bi her awayî destekê bide karên ji bo yekîtiya neteweyî û got, "KNK, ji bo avakirina platformeke hevpar a li ser yekîtiya neteweyî, bi hemû aliyan re rûdinê. Bi vê armancê hate serdana me jî. Ji ber vê serdanê em kêfxweş in û spasiya van hewldanên wan dikin. Em dixwazin bêjin, ku em amade ne bi her awayî piştgiriyê bidin û bi her şêwe erk û wezîfeyan rabin."

Endamên KNK'ê wê piştî serdana Tevgera Azadî bi hêz û partiyên siyasî yên Rojhilatê Kurdistanê re rûnê.

KNK, piştî banga xwe ya ji bo avakirina platforma hevkar a nirxandina mijara yekîtiya neteweyî, roja 12'ê Hezîranê dest bi hevdîtinan kir û bi dorê çû serdana Yekîtî Niştimanî Kurdistan (YNK), Tevgera Goran, Partiya Komala Îslamî, Partî Demokratî Kurdistan (PDK), Hizbî Zehmetkêşan, Yekgirtû Îslamî, Partiya Komunîst a Kurdistanê, Bizûtneweyî Îslamî û Koma Civakên Kurdistanê (KCK).