Gerîlayên Azadiyê yên Kurdistanê îsal li çiyayên Kurdistanê salvegera pêngava 15'ê Tebaxê bi coş û moraleke mezin pîroz dikin. Ev coş ji ber wê yekê ye ku berê tivinga gerîla timî li dijmin e. Pêşwazîkirina salvegera 40'emîn a pêngaveke bi vî rengî ya dîrokî li çiyayên Kurdistanê cihê moral û wateyeke mezin e. Bi taybetî şahidiya ji coş û biryardariya gerîla re cihê kêfxweşî û kelecanê ye.

Pêngava 15'ê Tebaxê ku pêngava destpêkê ya rizgariya ji tarîtiyê û guhertina qedera li ser gelê Kurd ferzkirî ye, 40 sal li pey xwe hişt. Ji wê rojê û vir ve gerîlayên azadiyê yên Kurdistanê li ser vê bingehê bi pêş ketin, di salvegera pêngava dîrokî de li ser şopa fermandarê nemir Fermandar Egîd pêngava serketinê kûr û dewam dikin. Ev pêngava berxwedanê ya dîrokî ku bi pêşengiya Gerîlayên Azadiyê yên Kurdistanê bi pêş ket, gelê Kurd ji qirkirinê rizgar kir û kir ku li nava dîrokê hebûna xwe misoger bike.

Rêber Apo dema bi vê pêngavê rabû, bi têkoşîneke bêeman Kurdîtiya li ber tinebûnê bû, yanî aqlê Kurdê bûbû êm ji dijmin re, ji tarîtiyê rizgar kir. Rêber Apo destnîşan kir ku civakeke baweriya xwe winda kiriye, tenê bi ser xwe hatinê dikare ji tinebûnê rizgar bibe. Ji bo ev pêngav bibe xwedî bingeheke îdeolojîk û felsefî gelekî hewl da. Gerîlayên Azadiyê yên Kurdistanê ku bi pêşengiya wî bi pêş ket, îro guhertinên mezin pêk anîn, pêngava azadiyê gihandin vê astê û kirin ku qat bi qat mezin bibe. Bi saya meyla hêzên gerîla ya xwendina rast a pêvajoyê û bersiva di cih de a li hemû êrişan, pêngavê timî dewam kir.

Pêngava 1'ê Hezîranê, pêngava şerê gel ê şoreşgerî yê 2011'an û pêvajoya berxwedana Garê ay 2021'ê ku di sala 4'emîn de derbên dîrokî li dijmin dixin, berxwedana gerîla ya topyekûn mînakên şênber ên vê yekê ne.

Pêngava 1'ê Hezîranê ji hin aliyan ve weke pêngava duyemîn a 15'ê Tebaxê dikare bê nirxandin. Ji ber ku vê pêngavê wê demê li dijî tasfiyekariya navxweyî û derve weke tevgereke pêngavî û berxwedanê destpê kir û bû pêngavek ji ruhekî mezin ê pêngavî. Pêngava şerê gel ê şoreşgerî yê sala 2011'an ku bi pêşengiya Şehîd Reşît Serdar, Şehît Azad Sîser û Şehîd Çîçek Botan pêk hat, ew pêngav bû ku têkoşîna gerîla ji çiyê gihand deştê, gund û bajaran. Stratejiya şerê gel ê şoreşgerî yê Rêber Apo yekemcar bi pêşengiya van lehengên nemir di pratîkê de bi cih hate anîn û dijmin têk bir. Dema ku ruhê pêngavê yê li nava gerîla bi asta pêşketina li gorî pêvajoyê re bû yek, bandoreke mezin kir, berevajî tevgerên berxwedanê yên dîroka nêz kir ku Tevgera Azadiyê ya Kurd li ser bingeheke xurt bimeşe.

Rêya bingehîn a fêhmkirina berxwedana gerîla ya niha, bi dîtina vê rastiyê dibe. Pêşketina ku hêzên gerîla di nava sê salên dawî de pêk anîn, bi qasî pêşketina bîst salên dawî ye. Ruh û daxwaza têkoşînê ya ku berxwedana gerîla afirand, coş û moraleke mezin dide mirovan. Nedîtin, nejiyîn û fêhmkirina vê bi gotina herî sivik korbûyîn ji dil û mejî ye. Gerîlayên Azadiyê yên Kurdistanê ku li Herêmên Parastinê yên Medyayê bi baweriya li azadiyê û ruhê fedaî yê Apoyî têdikoşin, Cejna Vejînê 15'ê Tebaxê bi coş û moraleke mezin pîroz kirin, pîrozbahiya herî mezin jî bi derbên giran ên li dijmin xistin pêk anîn û vê yekê hîn jî pêk tînin. Di pîrozbahiyên li qadên gerîla de em dibînin ku tovên azadiyê yên beriya 40 salan hatine reşandin li nava xakê şîn bûne û veguherîne darên mezin.

Gerîla her roj di bin bi sedan bombardûmanan de bi biryardarî çalakiyên serketî dikin, di heman demê de taktîkên şerê taybet ên dijmin têk dibin. Dewleta Tirk a dagirker salên dawî dibêjine li Tirkiye û Kurdistanê êdî gerîla qediya ye, du kes jî nikare li hev kom bibe. Dixwaze atmosfereke welê biaxfirîne ku dibêjî qey li ti cihî gerîla nikare tevbigere û bi vî rengî dixwaze têkiliya navbera hêzên gerîla û civakê qut bike. Lê belê tiştek heye ku ji bîr dike; hêzên gerîla hebûna xwe ya li her bihosta çiyayên Kurdistanê bi derbên giran ên li leşkerên artêşa Tirk a dagirker dixin nîşan didin. Ji ber ku ev dijmin ne ji gotinê, lê ji şer fêhm dike. Çalakî ji gotinê bêhtir encamê werdigire. Vaye pîrozbahî û çalakiyên 15'ê Tebaxê yên îsal nîşaneya şênber a vê yekê ne. Biryardarî û asta îdîayê ya li pîrozbahiyan nîşaneya şênber a ruhê fedaî yê Apoyî û dilsoziya Gerîlayên Azadiyê yên Kurdistanê ya bi têkoşînê re ye.

Ya ku dijmin 40 sal in nikare têk bibe û her carê jî har dibe û êriş dike ev ruh e. Gotineke pêşiyan a Fransiyan heye ku dibêje, 'Bawerî dikare çiyê jî ji şûna xwe bihejîne'. Gerîlayên Azadiyê yên Kurdistanê ev yek li gel hemû zor û zehmetiyan bi ser xistin. Bi baweriya xwe, bi ruhê xwe yê têkoşînê ya ku nepêkan bû pêk anîn. Mînaka vê yekê li cîhanê nîne, ji niha û pê ve jî wê nebe. Divê gelê Kurd bi vê baweriyê, vî ruhî û van lehengan dilsoz be û li ser vê rêyê bimeşe. Govenda şoreşê ya li çiyayên Kurdistanê tê gerandin divê li her derê belav bibe û derbeke dîrokî li faşîzmê bixe. Divê bê zanîn, her ku ev govenda şoreşê mezin bibe wê dijmin biçûk bibe û tine bibe.