Navenda Ragihandin û Çapemeniyê ya HPG'ê daxuyaniyeke nivîskî weşand û got, "Operasyona dagirkeriyê ya artêşa TC a dagirker şeva 16'ê Hezîranê saet di 21:30 de li herêma Zapê ya Herêmên Parastinê yên Medyayê da destpêkirin û şerê ji ber vê operasyonê rû da, di roja sêyemîn de bi dijwarî dewam dikin."

Li ser şer û çalakiyên gerîla yên 24 saetên dawî yên li vê herêmê, ev agahî di daxuyaniyê de hatin dayin:

"18'ê Hezîranê saet di 10:00 de, hêzên me li hêzên dijmin ên li quntarê Şehîd Mûnzûr dan û di encama derbên xurt de 3 leşkerên dijmin hatin kuştin, leşkere jî birîndar bû. Demeke kurt piştî vê çalakiyê, hêzên me cara duyemîn li leşkerên li heman herêmê xistin û di vê derbê de jî 2 leşkerên dijmin hatin kuştin.

Saet di 13:30 de, hêzên me li leşkerên artêşa TC a dagirker ên hewl didan li herêm Qela Bêdewê bi cih bibin xistin. Li vir leşkerekî dijmin hate kuştin. Piştî vê çalakiyê, saet di 17:00, 17:15, 17:30 û 18:30 de, hêzên me li leşkerên li vê herêmê dan. Di encama van 4 êrîşên li dijî hêzên dijmin de, bi qasî ku hate tespîtkirin 8 leşkerên dijmin hatin kuştin, gelek jî birîndar bûn.

Hêzên me heman rojê ji danê nîvro heta êvarê, 6 çalakiyên sabotajê li hemberî hêzên dijmin ên hewl dan li herêma Qela Bêdewê bi cih bibin, pêk anîn. Bi qasî ku hate tespîtkirin, di van çalakiyan de 8 leşkerên dijmin hatine kuştin.

Dijmin bi balafirên şer, helîkopterên bi tîpa Kobra, obus û hawanan bê navber bombe li herêmê barand. Çalakiyên hêzên me yên li vê herêmê heta danê vê sibehê dewam kirin.

Roja 19'ê Hezîranê saet di 07:30 de, hêzên me li leşkerên dijmin ên hewl didan li geliyê Sipê bi cih bibin û çeperan amade bikin, dan. Derb ji cihekî nêz lê hate dayin û di encamê de 7 leşkerên dijmin hatin kuştin, 2 leşker jî birîndar bûn.

Di heman demê de hêzên me li hêzên dijmin ên hewl didan li quntara herêma Şehîd Mûnzûr bi cih bibin, xistin. Di van derban de 2 leşkerên dijmin hatin kuştin, leşkerek jî birîndar bû.

Li hemberî çalakiyên bi bandor ên hêzên me, artêşa TC a dagirker careke din hewl da bi hêza teknîkê encamê bi dest bixe û saet di 08:00 de bi balafirên şer bombe li herêmê barand.

Di şer û çalakiyên hêzên me de, bi qasî ku hate tespîtkirin 31 leşkerên dijmin di nava 24 saetên dawî de hatine kuştin, gelek leşkerên dijmin jî birîndar bûne."