Ji bo hilbijartina parlementoya Iraqê, li Iraq û Başûrê Kurdistanê dengdanê di saet 07.00’an de dest pê kir. Li Kerkûkê li 6 cihan dengdanê bi derengî dest pê kir. Li navçeya Zaxo ya Dihokê jî ber temînnekirina hin amûr û alavan li 11 cihan deng nehate dayîn. Li Şeladizê jî ji ber amûr û alavên hilbijartinê naxebitin, li 3 cihan deng nehate dayîn. Hate diyarkirin ku li Dihokê li 2 cihan hê jî dengdanê dest pê nekiriye.

Sedemên derengketina dengdanê û dengnedayînê hê jî nehatiye fêmkirin.

DAÎŞ’Ê ÊRÎŞ KIR

Ji aliyê din ve DAÎŞ’ê duh êvarî li Xaneqînê êrîşî hin herêman kir û hilbijêr kir hedef.

Hate ragihandin ku DAÎŞ’ê êrîşî gundê Islah û Şeyh Bave yê navçeya Karatepe ya Diyalayê û gundê Aştûkanî yê navçeya Cebareyê kiriye.

Hate diyarkirin ku navenda dengdanê ya li gundê Islahê bûye hedef û 3 kes birîndar bûne. Li gundên Xaneqînê jî yên ku bûne hedefa DAÎŞ’ê, gelê Ereb û Tirkmen dijîn.

LI KERKÛKÊ PÊŞIYA ÊRÎŞÊ HATE KIRIN

DAÎŞ’ê di destê sibehê de xwest êrîşî Kerkûkê bike. Piştî ku yekîneyên ewlehiyê ev rewş dîtin,pêşiya êrîşê girtin.