Parlementerê HDP’ê yê Entelyayê Kemal Bulbul li Semsûrê çû serdana Sûka Titûnvanan. Endamê Meclîsa Partiyê Îzzet Karadag û gelek HDP’yî bi Bulbul re çûn serdana esnafan. Di serdanê de qala qanûna nû ya ji bo titûnvanan hate kirin. Li gorî qanûna nû kesên ji Wezareta Çandinî û Daristanê ‘belgeya destûrê’ nestînin û titûnê bifiroşin wê cezayê girtîgehê li wan were birîn.

Di serdanê de esnafekî got “Min 4 donim ajotiye. Ji min re bibêjin evqas bacê bidin, ez ê bidim lê dema ku bibe kooperatîf wê me bixapînin.”

Esnafekî din jî got “Em ji kal û bavên xwe vî karî dikin, tu carî wekî niha em neketibûn rewşeke wisa xerab. Qala baceke bi qasî ji sedî 60’î dikin, em ê çawa bidin? Ji sedî 70’ê Semsûrê bi titûnê debara xwe dikin. Heke qedexe were ragihandin wê gelek dikan vala bimînin.”

Parlementerê HDP’ê Kemal Bulbul jî diyar kir hilberîner û cotkarên titûnê li hemberî vê polîtîkaya dewletê aciz in û got, “Li gorî qanûnê ji sibê û şûnde wê şandina titûnê ya bi kargoyê û hilberîna wê were qedexekirin. Mirov dixwazin ev tişt neyê qedexekirin. Hilberîner û firoşkar gelek gazinan dikin. Hilberîner piştî ku heqê keda xwe nestend wê çima titûnê hilberîne? Divê daxwazên hilberîneran were pêkanîn.”