Gerîlayên HPG û YJA-Starê bi boneya 44’emîn salvegera damezrandina Partiya Karkerên Kurdistanê (PKK) ji ANF’ê re axivîn. Gerîlayên Azadiyê, bal kişandin ser girîngiya têkoşîna li dijî tecrîda girankirî ya li ser Rêberê Gelê Kurd Abdullah Ocalan û banga bilindkirina têkoşînê kirin. Gerîlayên Azadiyê her wiha diyar dikin ku PKK ji bo gelên Rojhilata Navîn û hemû gelên bindest têkoşîna mirovatiyê bi rê ve dibe.

Yek ji wan gerîlayan Masîro Şoreş, bal kişand ser tecrîda girankirî ya li ser Rêberê Gelê Kurd Abdullah Ocalan tê rêvebirin kir û banga têkoşîna li dijî tecrîdê kir. Masîro Şoreş ragihand ku têkoşîna wan wê heta dawiyê berdewam bike û derbarê salvegera damezrandina PKK’ê de jî ev nirxandin kir: “Em îsal dikevin 45’emîn sala damezrandina PKK’ê. Berxwedana me bi şerê li Zap, Metîna û Avaşînê ya li hemberî dewleta Tirk a faşîst berdewam dike. Berxwedan, têkoşîn û qehremaniya di vî şerî de ji bo me moralê herî mezin e. Hesta ku herî zêde li gel me ava dibe û tişta herî zede em pê kêfxweş dibin ew e ku me di nava gerîla de cihê xwe girtiye. PKK ji bo têkoşîna gelan ava bûye, bi vî awayî mezin bûye û têkoşîna xwe heta roja me ya îro aniye. PKK ne tenê ji bo gelê Kurd, ji bo hemû mirovatiyê, gelên azadîxwaz û berxwedêr têdikoşe. Ji ber ku PKK temsîliyeta mirovahiye dike. Niha li Hêremên Parastinê yên Medyayê berxwedaneke pir pîroz tê raberkirin. Gerîla tu carî rê nedaye ku dagirkerî  derbasî axa me bibe û em rê nadin jî.  Em bi moralê ku ji hevaltî, têkoşîn û berxwedana Rêber Apo û gelê xwe digirin, têkoşîna xwe bi rê ve dibin.”

Gerîlayê HPG’ê Masîro Şoreş herî dawî bang li ciwanan kir ku tevlî nava refên gerîla bibin û wiha axaftina xwe bi dawî kir: “Ez bang li ciwanan dikim bila erk û berpirsiyariyên xwe pêk bînin. Em ber bi serkeftinê ve diçin. Divê têkoşîn û keda her kesî di vê meşê de hebe. Em bang li ciwanan dikin ku di vê berxwedaniya pîroz de cihê xwe bigirin.”

‘EV SAL WÊ BIBE SALA AZADIYÊ’

Gerîlaya YJA-Starê Sîdar Mexmûr jî da zanîn ku wek fedayiyên Rêberê Gelê Kurd Abdullah Ocalan şikandina tecrîdê dikeve ser milê wan û got: “Di 45’emîn salvegera damezrandina PKK’ê de me di her alî de serkeftin ji xwe re kiriye armanc. Li hemberî dijmin serketin a me ye. PKK bi xwîn û keda şehîdan mezin bûye û heta roja me ya îro hatiye. PKK di 45’emîn salvegera xwe de, ji her demê zêdetir hêz û baweriyê ava dike. Ev sal wê bibe sala azadiya fizîkî ya Rêber Apo û gelê Kurd. Soza me ew e ku em bigihîjin serketinê.”

Gerîla Sîdar Mexmûr jî banga tevlîbûna nava refên gerîla kir û wiha pêde çû: “Eger jiyanek a min ji nû ve çêbûba, min ê ew jiyan jî dîsa di nava PKK’ê de jiyan bikira. Ji ber ku PKK cihê jiyana pîroz û keramet û qehremaniyê ye.”

‘PKK JI BO GELÊN BINDEST ÇAVKANIYA MORAL Û HÊVIYÊ YE’

Gerîlayê HPG’ê Çiyako Gabar jî salvegera damezrandina PKK’ê li gelan pîroz kir û diyar kir: “Wek gerîlayên HPG’ê ji bo ku tecrîd were şikandin, em ê heta dilopa dawî ya xwîna xwe têkoşîna xwe bilind bikin. 45’emîn salvegera damezrandina PKK’ê, em li Serokatî, li hevalên şehîd û hemû gelên bindest pîroz dikin. PKK hem ji bo me, hem jî ji bo gelê me xwediyê wateyek pir cûda ye. PKK ji roja hatî damezrandin heta roja îro, ji bo hemû gelên bindest bûye çavkaniya moral û hêviyê. PKK wek partiyeke mezin ji bo hemû Rojhilata Navîn peşengiya têkoşîn û azadiyê dike.”

‘BERXWEDANA KEMAL, XEYRÎ Û SARAYAN ÎRO LI ÇIYAYÊN KURDISTANÊ TÊ RABERKIRIN’

Gerîlaya YJA Starê Viyan Avesta jî dibêje ku çavkaniya hêz û moralê Rêber Apo ye û wiha axivî: “Her wiha hêza ku em digirin, hêza hevalên ku îro di çeperan de li ber xwe didin, hevalên ku di zindanan de têdikoşin e. Em li ser bîr û baweriya Serokatî dimeşin. Di sersala damezirandina Partiya me de têkoşîn gihîştiye asta lûtkeyê. Partiya me bi Kemal, Xeyrî û Sarayan ve dest pê kir. Roja me ya îro şopa berxwedana wan hevalan li çiyayên Kurdistanê tê meşandin. Kemal Pîr bû Baz Mordem, Sara bû şehîd Helbest Koçerîn. Bila dijmin vê yeke ji bîr neke; berxwedana ku em didin meşandin ti carî bin nakeve. Ji ber ku em bi bîr û baweri û îradeya xwe dimeşin. Em bi felsefeya Rêber Apo dimeşin. Di çeperên Zap, Avaşîn û Metîna de berxwedanek di asta herî jor de heye. Her çiqasê çekên kimyewî li ser me were bikar anîn jî, lê li hemberî wan em ti carî paşve gav navêjin. Bila dijmin vê yekê baş bizanibe.”