Gerîlaya YJA Starê Nûda Zagros a cihê xwe di Pêngava Şoreşgerî ya Cenga Xabûrê de digire, qala berxwedan û ruhê berxwedanê yê gerîlayên pêngavên Şoreşgerî yên Cenga Xabûr û Bazên Zagrosê kir.

‘BI RUHÊ FEDAYÎ YÊ APOYÎ ŞER DIKIN’

Gerîla Zagros destnîşan kir ku ew ê bi ruhê demê şerê hebûna gelê Kurd pêk bînin û got: “Berî ku operasyona dagirkeriyê destpê bike amadekariyên me û yên hemû hevrêyan di asteke bilind de hebû. Niha jî ev şer bi ruhekî fedayî yê Apoyî li çeperên şer hemûyan dewam dike. Hevrê hemû di çeperên şer de bi hêz û moraleke mezin li dijî dagirkeriya dewleta Tirk şer dikin. Dema mirov qala Cenga Xabûrê dike, bi taybetî berxwedana hevrêyên me yên li Girê Zendûrayê coş û kelecaneke mezin dide mirovan.

‘GERÎLA TEKNÎKA DIJMIN PÛÇ DIKE’

Zagros bal kişand ser êrîşên dagirkeriyê yên dewleta Tirk a dagirker û wiha domand: “Artêşa Tirk a dagirker bi awayekî dijwar giraniya xwe daye ser heremên Metîna û Zagrosan. Gerîla bi ruhekî afirîner, teknîka dijmin pûç dike. Ji ber gerîla bi ruhê demê tevdigere. Di warê kamuflajê, rê û rêbazên şer û naskirina bejahiyê ve avantaj di deste gerîla de ye. Gerîla hem di şerê tûnelan de, hem jî li bin erd û ser erd rêbazên dewlemend bikar tîne.

‘BI ŞÊWAZ Û TEKTÎKÊN NÛJEN EM Ê BI SER BIKEVIN’

Dewleta Tirk a dagirker wê nikaribe bi operasyonên dagirkeriyê me ji ziman û hebûna me dûr bixe. Gerîla li gor ruhê demê û felsefeya Rêber Apo tevdigere, ji ber wê, wê dagirker bi rehetî li van herêman nemînin. Ev berxwedan di çarçoveya Cenga Xabûrê û Bazên Zagrosan de wê rê nede dagirkeran, em ê dagirkeriyê têk bibin. Bi şêwazên gerîlatiyê, bi ruhê Apoyî û taktîkên nûjen em ê dagirkeran di Cenga Xabûrê de têk bibin. Serketin a gelê Kurd e."