Li navçeya Pirsûsê ya Rihayê di 20’ê Tîrmeha 2015’an de komek ciwanên sosyalîst ku dixwestin pêlîstokan bibin Kobanê, endamên DAIŞ’ê li dijî wan êrişa bombeyi pêk anî û 33 ciwanên sosyalîst hatibûn qetilkirin. Danişîna 16’emîn a doza Komkujiya Pirsûsê li Dadgeha Cezayê Giran a 5’emîn a Rihayê hat lidarxistin. Parêzerên dozê Sezîn Ûçar, Serdil Îzol û parêzerên endamên Baroya Rihayê û Baroya Îzmîrê û Parlamenterê HDP’ê yê Rihayê Omer Ocalan danişînê şopandin. Derket holê ku şandeya dadgehê guherî ye.

Tekane bersûcê dozê Yakûp Şahîn ê girtî tê darizandin ji Girtîgeha Rihayê ya Tîpa T bi rêya dîmen û deng (SEGBÎS) beşdarî danişînê bû.

Danişînê bi xwendina belgeyên nû li dosyeyê zêde kirine dest pê kir. Ji navên sereke yên dozê Abdullah Omer Aslan ê mele bi îdiaya ku têkiliya wî bi endamên DAIŞ’ê re nîne derbarê wî de biryara neşopandinê hat dayîn.

Parêzeran bertek nîşanî biryara neşopandina derbarê Aslan de da û diyar kirin ku ew biryara neşopandinê qebûl nakin. Parêzeran xwest ku Serokwezîrê wê demê Ahmet Davûtoglû bila were guhdarîkirin û bersûc Yakûp Şahîn bînin eywana danişînê.

Piştî navbera hat dayîn, şandeya dadgehê daxwaza guhdariya Davûtoglû û anîna bersûc Yakûp Şahîn a eywana danişînê red kir. Şandeya dadgehê biryara ku danişînek din li Girtîgeha Rihayê ya Tîpa T were dîtin da û danişîn taloqî 9’ê Sibata 2021’an kir.