Cenazeyê şehîdê Çapemeniya Azad, têkoşer û rojnamevan Azîz Koyluoglû ku di 27’yê Çileyê de li Ranyayê di encama bombebarana balafira bêmirov ya dewleta Tirk a dagirker de şehîd bû, îro bi beşdariya gelek welatparêz, malbatên şehîdan, rojnamevan û çalakvanan li Şehîdgeha Binarê Qendîlê bi merasîmeke girseyî hate veşartin.

Di merasîmê de Endamê Komîteya Malbatên Şehîdên PKK’ê ya Başûrê Kurdistanê Wehab Ehmed axivî û wiha got; “Em weke Komîteya Malbatên Şehîdên PKK’ê ya Başûrê Kurdistanê, di şexsê Azîz Koyluoglû de hemû Şehîdên Azadiya Kurdistanê bi bîr tînin û silavên xwe li hemû kesên ku li ser şopa şehîdan dimeşin û têdikoşin dikin.’’

Rojnamevan Hewar Muhammed jî axivî û diyar kir ku Dewleta Tirk li pêş çavên hemû cîhanê rojnamevanan qetil dike û ev yek anîn ziman: ‘’Ev yek nîşan dide ku ew gelekî ji dengê azadiyê ditirsin. Herî dawiyê di 27’ê Çileyê de hempîşeyê me Azîz Koyluoglû qetil kirin. Koyluoglû ev 25 sal bûn rojnamevantî dikir û kedkarê Çapemeniya Azad bû. Em ê weke kedkarên Çapemeniya Azad, heya dawiyê li dû ragihandina rastiyan bin. Dagirker her çend hewl bidin me bêdeng bikin jî em ê bibin dengê heqîqetê.’’