Bi hezaran welatiyên bajarê Qamişlo bi hemû pêkhateyên xwe ve li pêşiya Meclîsa Malbatên Şehîdan a li taxa Enteriyê kom bûn, cenazeyê Endamê HPC′ê Mûaz Îsa ku di 26′ê Sibatê de li bajarê Qamişlo di encama qezayekê de şehîd bibû, wergirtin û ber bi Goristana Şehîd Delîl Sarûxan ve ketin rê.

Li goristanê merasîma leşkerî ji aliyê şervanên YPG/YPJ′ê ve destpê kir. Piştre Endama Meclîsa Malbatên Şehîdan Ayde Xelîl axivî û soza şopandina rêya cangoriyên azadiyê da, diyar kir ku civak azad bibe wê biratiya gelan jî pêk were.

Fermandarê HPC′ê Aram Ezîz anî ziman ku ew ê di xebatên xwe de felsefeya neteweya demokratîk esas bigirin, ji bo civaka xwe ji dijminên hov biparêzin.

Cîgirê Serokê Desteya Parastinê Ebdulehed Gewriye jî berxwedana gelê Bakurê Sûriyê silav kir û got ku şervanên azadiyê bi saya felsefeya Rêbertiyê ya biratiya gelan û jiyana hevbeş, axa welat ji çeteyên DAIŞ′ê rizgar kirin.

Piştî axaftinan, nasnameya têkoşer hat xwendin, radestî malbatên wan hatin kirin.

Di dawiya merasîmê de cenazeyê Mûaz Îsa bi dirûşim û tilîliyan ve hate veşartin.