Bi sedan welatiyên bajarê Minbicê cenazeyên şervanên Meclîsa Leşkerî ya Minbicê Ebdulkerîm Qewace ku li gundê Erîma yê rojavayê Minbicê ji ber mayîneke çeteyên DAIŞ′ê, Elî Tebaş (Ebû Îlyas) û Raxib Nasir (Mezlûm Minbic) ên ku li gundên bakur rojavayê bajêr di berxwedana li dijî çeteyên Mertala Firatê û Hecûc El-Hisên ên jiyana xwe ji dest dabûn, ji nexweşxaneya Firatê wergirtin û ber bi Goristana Şehîdên Minbicê ve ketin rê.

Li goristanê ji aliyê Şervanên Meclîsa Leşkerî ya Minbicê ve merasîmekî leşkerî hat lidarxistin. Piştre Endamê Saziya Malbatên Şehîdan Îbrahîm El-Xelf axivî û diyarkir ku şehîdên azadiyê destanên lehengiyê ava dikin, her wiha berxwedana şervanan silav kir û soza şopandina rêya wan da.

Li ser navê Meclîsa Leşkerî ya Minbicê Şervan Derwîş jî axivî û diyarkir ku şervanên azadiyê ji bo parastina welatê xwe canê xwe feda dikin û got: ″Lehengên me li eniyên berxwedanê li dijî êrîşên çeteyan şer dikin.″

Di dawiyê de Endama Meclîsa Zagonsaz-Rêveberiya Sivîl a Demokratîk a Minbicê û gundewarên wê Ezab El-Ebûd jî axivî û soza şopandina rêya şervanên azadiyê da.

Piştî xwendina nasnameya her 4 şervanan, cenazeyên her 4 şervanan li goristanê hatin veşartin.