Bi munasebeta 25'ê Mijdarê li bajarê Çomanê jinan daxuyaniyek dan çapemeniyê û destnîşan kirin ku têkoşîna li hemberî tundiya li dijî jinê, erkeke exlaqî ye.

Bi wesîleya 25'ê Mijdarê Roja Têkoşîna li hemberî Tundiya li dijî Jinê, Rêxistina Jinên Azadîxwaz a Kurdistanê (RJAK) li gundê Derbendraît ê bajarê Çoman ê Başûrê Kurdistanê daxuyaniyek da.

Li dû deqeyeke rêzgirtinê li ser navê RJAK'ê Nesrîn Bapîr Qadir daxuyanî xwend.

Di daxuyaniyê de hat ragihandin ku tundî berhemek ji hişmendiya desthilatdariyê ye û hat destnîşan kir ku sîstema desthilatdariyê bi vê îdeolojiya xwe re hewl dide jin û civakê bê vîn û kesayet bike.

Endama RJAK'ê Nesrîn Bapîr Qadir diyar kir ku tundiya li hemberî jinê di warê siyasî, derûnî, aborî û fîzîkî li her qada jiyanê tê meşandin û anî ziman ku têkoşîna li hemberî vê tundîtîjiyê erka mirovahî û exlaqî ye.

Di dawiya daxuyaniyê de bang li hemû jinan hat kirin ku têkoşîna xwe ya li dijî vê hişmendiyê xurt bikin û ti carî bêdeng nemînin.