Di 8’ê Adarê Roja Jinên Cîhanê de jinên Dersimî mitînga pîrozbahiyê li Qada Seyîd Riza li dar xistin. Li qada mitîngê coşeke mezin hebû û jinan bi pankart, dowîz û dirûşmên xwe peyam dan. Jinan, di mitîngê de dirûşmên “Jin, jiyan, azadî”, “Em bêdeng namînin, îtaet nakin” û “Bijî têkoşîna jinan” berz kirin û li ber dawûl û zirnayê xelekên govendan gerandin.

Mitîng, bi axaftina endama Platforma Jinan a Dersimê Fatma Argin dest pê kir. Taşkale diyar kir ku li dijî serdestiya mêr, newekhevî, tundî, şer, kedxwarî û xizaniyê weke jinan dîsa dadikevin qadan. Di berdewamê de jî Taşkale destnîşan kir ku bi têkoşîna xwe hewl didin pêşî li polîtîkayên zext, tundî û çewisandinê yên mêrê serdest bigirin. Bi domdarî Taşkiran bal kişand ser binpêkirinên li girtîgehan û xwest ku hemû girtiyên nexweş di demekî herî kin de bên berdan.

Endama MYK’a Partiya Herêmên Demokratîk (DBP) Bêrîvan Sîncar jî ji ewil hemû siyasetmedarên jin ên siyasî silav kir û da zanîn ku ew li dijî şer, qirkirin û tundiya li ser jinê, li her devera Kurdistanê daketine qadan.

PEYAMA PLATFORMA JINAN

Her wiha di mitîngê de peyama Platforma Jinên Kurd a Yekbûyî jî hate xwendin. Platformê di peyama xwe de destnîşan kir ku ew 8’ê Adarê li her çar aliyên Kurdistanê bi ruhê jinên Kurd pêşwazî dikin û wiha bi dawî kir: “Ji Rojava heta Rojhilat, ji Bakur û heta Başûrê Kurdistanê, qîrîna 8’ê Adarê ya jinên Kurd dê yekitiya jinên Kurd ava bike. Her gelek, dîroka xwe bi ziman û çanda xwe dinivîse. Banga me jî ji bo hemû jinên Kurd ew e ku her yek ji me bibe nefereka ziman û çanda xwe. Bi vê wesîleyê em 8’ê Adarê li hemû jinên Kurd û cîhanê pîroz dikin. Bijî Yekitiya Jinên Kurd.”

Piştî axaftinan jî Koma muzîkê ya Şaredariya DErsimê derket ser dikê û jinan li ber stranên wan xelekên govendê gerandin.