Gulnaz Karataş (Bêrîtan) ku 23 salan jiyana xwe ji dest dabû, di salvegera 23'emîn de, ji aliyê Koordînasyona KJK'ê ve hate bîranîn. KJK'ê di daxuyaniya xwe ya nivîskî de got: ''Di meha Cotmehê de Bêrîtanan, Xurbetan, Meryeman, Ronahiya Elman, Hêlîna Çerkez, Rotîndayan, Sanem Bêrîtanan, Rûkenan, Rojînan, Jiyan Ahreziyan, Arîn Mîrxanan bê dudilî, govenda azadiyê gerandin û  gihiştin şehadetê. Ev şehîdên me yên jin,  her tim bi dilsoziya rûmeta azadî û nirxên mezin jiyan û dan jiyandin. Ew tiyê azadiyê bûn. Ji ber ku tiyên azadiyê bûn li çiyayan, deştan, û herî dawî li çolên germ û kolanan, li ber dîwaran her derê kirin qada şer.''

Komalên Jinên Kurdistanê (KJK) bi daxuyaniyeke nivîskî Gulnaz Karataş (Bêrîtan) bi bîr anî û got: ''Em bi wezîleya 23'emîn salvegera şehadeta hevala Bêrîtan (Gulnaz Karataş), hemû şehîdên meha Cotmehê yên ku di dîroka azadiya jinan de rola pêşengiyê lîstine û bi şêwaza xwe ya jiyanê û rastiya şehadetê rêya me ronî kirine, bi bîr tînin.  Em berxwedana gel, jin û hemû dostên me ya li tevayî Kurdistanê û bi şêwaza Bêrîtanan tê meşandin silav dikin.''

KJK'ê operasyona dersînor a sala 1992'ê li dijî gerîlayan pêk hat, bi bîr  xist û got: ''Li hemberî hêzên tuneker heval Bêrîtan, israra wê ya ji bo azadiyê û dilsoziya wê ya bi Rêber Apo re, xwe di kendalê de avêt. Li dijî teslîmyet û hevkaran rêya berxwedanê hilbijart û bû yek ji rêwiyên dirûşma 'Berxwedan Jiyan e' ya Mazluman.''

Koordînasyona KJK'ê bal kişand ser girîngiya meha Cotmehê ya ji bo şoreşa azadiya gelê Kurd û jinan û têkildarê şehîdên meha Cotmehê wiha got: ''Di meha Cotmehê de Bêrîtanan, Xurbetan, Meryeman, Ronahiya Elman, Hêlîna Çerkez, Rotîndayan, Sanem Bertanan, Rûkenan, Rojînan, Jiyan Ahreziyan, Arîn Mîrxanan bê dudilî, govenda azadiyê gerandin û  gihiştin şehadetê. Ev şehîdên me yên jin,  her tim bi dilsoziya rûmeta azadî û nirxên mezin jiyan û dan jiyandin. Ew tiyê azadiyê bûn. Ji ber ku tiyên azadiyê bûn li çiyayan, deştan, û herî dawî li çolên germ û kolanan, li ber dîwaran her derê kirin qada şer. Bi feraseta parastinê ya jinan a li Rojava û asta serkeftinê ya bi pêşengiya jinan, careke din asta jinan a azadkirinê civakê îspat kiriye. Jinên li Rojava li ber xwe didin temînata azadiya hemû jinên Kurdistan û cîhanê ne.''

KJK'ê diyar kir ku heval Bêrîtan li serê girên bê dawî meyzandiye û gotiye ''Xwezî rojekê bi sedan bi hezaran jin li ser van giran bikevin pey hev û bimeşin, ez jî vê meşa azadiyê bibînim ev xeyala min a herî mezin e.''  KJK'ê got: ''Gelek bi ser re derbas nebû, Rêber Apo ji bo bîranîna çalakiya Bêrîtanê biryara artêşbûna jinê da. Û xeyalên Bêrîtan bûn rastî. Îro YJA-Star, li Rojava YPJ, li Rojhilat HPJ, bi sedan jin li van çiyayan dimeşin.'' KJK'ê destnîşan kir ku jinên îro bûne artêş li çiyayan, deştan, çolan, bajaran û heta li Ewropayê bûn pêşengên lehiya azadiyê. KJK'ê artêşbûna jinan weke 'berhema Bêrîtanan' bi nav kir û destnîşan kir ku îro bi sedhezaran li ser rêya lêgerîna azadiyê dimeşin.''

KJK'ê di daxuyaniya xwe de bal kişand ser polîtîkayên dewleta Tirk a li hemberî berxwedana Rojava û Kobanê û got: ''Niha dewleta Tirkiye li Bakûrê Kurdistanê behsa pêvajoya çareseriyê dike, li Rojava jî ji bû gurbûna şer her tiştê ji destê wê tê dike.'' KJK'ê bal kişand ser berxwedana jinan a li Rojava û diyar kir ku li hemberî hemû polîtîkayên qirêj û sextekar, dibêjin 'Pê li cenazeyê me jî bikin, em ê teslîm nebin' û bal kişand ku li Rojava, Şengal, Kerkûk, Bakurê Kurdistanê, li Rojhilat û her derên Kurdistanê bi ruhê Hevala Bêrîtan li ser piyan in.

Koordînasyona Komalên Jinên Kurdistanê (KJK) di şexsê Gulnaz Karataş (Bêrîtan) de hemû şehîdên şoreşa azadiyê bi bîr anî û got: ''Li ser vî esasî em careke din dayikên Kurdistanî yên ku heval Bêrîtan û hevalên mîna Bêrîtanê mezin kirin bi rêzdarî û hezkirinê silav dikin. Em soz didin ku em ê bibin hêjayê dayik û jinên kedkar.''

KJK'ê di dawiya daxuyaniya xwe de got: ''Em bi hewldan û keda bêhempa ya Rêbertiya me û hevalên me yên şehîd hîn bû ka em kî ne, ji ku hatine û hem çawa jiyaneke azad bijîn.'' KJK'ê banga xurtkirina têkoşînê kir û got: ''Li ser esasê rastiya jiyanê ya li gorî Rêbertiya me, em banga xurtkirina xweparastina jinan, xwerêxistinkirin û bihêzkirinê li hemû jinan dikin û hemû êrîşan vala derxin. Her wiha, em banga têkoşîna li dijî hişmendiya zilam û çanda tecawizê dikin, li ser xeta Bêrîtanê xwedî li şoreşa Kurdistan û jinan derkevin û têkoşînê xurt bikin.''