KJA’yê, diyar kir ku Newroz ji aliyê jinên Kurd ve hatiye civakîkirin.  KJA’yê da zanîn ku bi ‘Deklerasyona Aştî û Demokrasiyê’ ya di 2013’an de ji aliyê Rêber Apo ve hatiye weşandin re agirê azadiya gelan hatiye hildan. KJA’yê da zanîn ku wê Newroza 2015’an  bibe tifaqa gelan û pêngava azadî û demokrasiyê ya Kurdistanê.

Kongreya Jinên Azad (KJA) der barê Newrozê de peyamek weşand.

Di peyamê de hat diyarkirin ku Newroza ku cejna gelên Mezopotamya û gelên Rojhilata Navîn e, di aliyê jinan jî bi taybet girîngiyê digire nav xwe û îfadeya jiyana nû ya Newrozê bi afirîneriya jiyanê ya jinan wateyek cuda qezenc kiriye. KJA di daxuyaniyê de got: “Newroza ku di heman demê de berxwedanê îfade dike, bi bedena jina ku bûye Newroz gihiştiye heqîqetek cuda.”

NEWROZ BÛ NAVÊ JIYANA AZAD

Daxuyaniyê wiha berdewam kir: “Têkoşîna azadiya li Kurdistanê tê meşandin di şexsê jinê de Newroz gihandiye  karaktera xwe yê xweser. Zekiye, Rahşan, Ronahî, Bêrîvan, Sema û Elefterîa ku gihiştin heqîqeta agir, bi bedena xwe agirê azadiyê pêxistin û di têkoşîna azadiya jinê de bûn sembola agirê azadiyê û bûne meşaleya berxwedana hevdem a Newrozê. Li dijî pergal û zîhniyeta serdest a mêr biryarbûn û hişmendiya jinê derxistiye holê. Têkoşîna azadiya jinên Kurd bi îradeyeke xurtir, jinên Kurd ji bo Rojhilata Navîn û mirovahiyê veguheriye perspektîfeke jiyanê.

Ji bo Kurdan Newroz, bûye navê jiyanek azad. Bi têkoşîna azadiyê ya jinên Kurd re Newroza ku bû navê jiyana nû, civakî bû û li dijî şîdet, taciz, tecawiz û qetilkirinên jinan têkoşîna xwe bilind kiriye.”

AGIRÊ AZADIYÊ RÊBER APO PÊXIST

Di peyamê de li ser manîfestoya azadiyê ya ku Rêber Apo di Newroza 2013’an de nivîsiye û wiha hate berdewam kirin: “Ji bo demokratîkbûna gelên Rojhilata Navîn, Gelê Kurd û Tirkiyeyê di 2013’an de Rêber Apo Deklerasyona Demokrasî û Aştiyê weşand û bi vê re agirê azadiyê yê gelan hat hildan. Ji bo Kurdan bû navê hêviyek nû û lêgerînek nû.”

Di dawiya daxuyaniyê de hat destnîşankirin ku wê Newroza 2015’an bibe pêngava azadî û demokrasiyê ya li Kurdistanê û tifaqa gelan û hat gotin ku bi berxwedana Rojava, Şengal û Kobanê re jinan ji vê re pêşengî kiriye û wê jin dîsa bi heman heybetê ji Newrozê re pêşengiyê bike.

KJA’yê Newroza hemû gelê Kurd û gelên Rojhilata Kurdistanê pîroz kir.