KCK: “Gelekî eşkere ye ku ev karesat ji ber xemsariyan rû daye. Ji ber ku dewlet û desthilatdarî erkên xwe yên sereke bi cih naînin, li Tirkiyeyê bûyerên weke îhmalkarî, gendelî, xizaniya gel û zehmetiyên jiyanî bi awayekî zêde rû didin.”
Hevserokatiya Konseya Rêveber a KCK’ê bi boneya şewata li Hotêla Grandê ya li Navenda Liyanê ya Kartalkaya ya Bolûyê ku 66 kesan jiyana xwe ji dest da daxuyaniyek nivîskî weşand.
Di daxuyaniya Hevserokatiya Konseya Rêveber a KCK’ê de wiha hate gotin: “Di encama şewata otêla li tesîsên Kartalkaya ên li Bolûyê de bi dehan kesan jiyana xwe ji dest dane û birîndar bûne. Ji raya giştî re hate parvekirin ku 66 kesan jiyana xwe ji dest dane û zêdetirî 50 kesî jî birîndar bûne. Em dixwazin diyar bikin ku vê bûyerê em gelekî xemgîn kirine. Rehma Xwedê li ser kesên jiyane xwe ji dest dane be û ji malbatan wan re sersaxiyê dixwazin. Ji birîndaran re jî şifayê dixwazin.
EŞKERE YE KU EV KARESAT JI BER XEMSARIYÊ RÛ DAYE
Gelekî eşkere ye ku ev karesat ji ber xemsariyan rû daye. Karesatên bi vî rengî ku li Tirkiyeyê gelekî rû didin, tim ji ber xemsariyê rû didin. Ji ber ku dewlet û desthilatdarî erkên xwe yên sereke bi cih naînin, li Tirkiyeyê bûyerên weke îhmalkarî, gendelî, xizaniya gel û zehmetiyên jiyanî bi awayekî zêde rû didin. Deshilatdariya Tirkiyeyê, di çarçoveya xizmetguzariya gel de ku erka wê ya sereke ye, tevnagere. Tekane tişta ku heya niha desthilatdariyê giranî dayê û li ser çavkaniyan xerc dike, qirkirina gelê Kurd û şerê li dijî gelê Kurd e. Hemû neheqî, kiryarên nedemokratîk, gendelî, îhmalkarî û dizî weke encameke vê ferasetê derketîne holê û zêde bûne. Ger zext neyê kirin û têkildarî bûyerê lêkolînên berfireh werin kirin, wê eşkere bibe ku şewata otêla li tesîsên Kartalkaya ên li Bolûyê rasterast bi vê ferasetê ve girêdayî ye.
DIVÊ MUXALEFET XEMSARÎ Û SEDEMÊN RASTÎN DERXE HOLÊ
Lê belê weke hemû caran zext tê kirin, biryara qedexeya weşanê tê dayîn, rê li ber lêkolîneke serbixwe û berfireh tê girtin. Weke hemû caran bi veşartina rastiyan û tevlîhevkirina bûyerê re saziyên eleqedar kesekî weke sûcdar diyar dikin yan jî çend kes tên binçavkirin û bûyer tê veşartin. Mixabin ku sedemên rastîn û zîhniyet û polîtîkayên di bin van sedeman de nayên eşkerekirin. Em hêvî dikin ku vê carê wê muxalefet û rêxistinên civakî bi awayekî berfireh li ser vê karesatê bisekinin, xemsarî û sedemên rastîn ên xemsariyê derxînin holê û bernameyeke nûbûn û demokratîkbûnê ya ku wê sererastkirineke rastîn dabîn bike, pêş bixin.”
