Jinên Kurd ên li Başûrê Fransayê dijîn, di kampa Jineolojiyê de li hev civiyan. Kamp li bajarê St. Maxîmînê pêk hat û ji aliyê Meclîsa Jinê ya Arîn Mîrkan a Marsîlyayê ve hate organîzekirin. 40 jin tevlî kampê bûn û 4 rojan dewam kir.

Şevîn Kekîk ku bernameya perwerdeyê ya roja destpêkê ya kampê amade kir, işaret bi baldariya jinan kir û got, perwerde ji roja destpêkê heta ya dawiyê ve gelekî erênî derbas bû. Kekîk got, "Dema ku jinan perwerde didîtin, zarokên wan jî bi wan re bûn û li nava xwezayê ji xwe re bi lîstikan dilîstin."

Ji komîteya Jineolojiyê Zîlan Diyar li kampê qala dîroka tevgera jinên Kurd û pêvajoyên guhertinê kir. Diyar anî ziman ku jinên tevlî kampê bûn gotin ku perwerde gelekî erênî derbas bûye û got, bi saya vê perwerdeyê hê bêhtir ji xwe bawer bûne.

Yek ji mijarên sereke yên perwerdeyê, hevjiyana azad bû. Di roja dawî ya kampê de jinên beşdar lîstikên şano pêşkêş kirin û koroya ji zarokan derketin ser dikê. Kamp bi dirûşma "Jin, Jiyan, Azadî" qediya.