Meclîsên Jinan ên Sosyalîst ên ESP'ê dan xuyakirin ku di meha Cotmehê de 24 jin ji aliyê mêrên herî nêzî xwe ve bi çek û kêrê hatine qetilkirin. Di 10 mehên salê de herî kêm 149 jin ji aliyê mêran ve hatin qetilkirin.

Meclîsên Jinan ên Sosyalîst ên ESP'ê rapora tundiya mêr a di meha Cotmehê de aşkera kir. Di raporê de hat ragihandin ku tundiya mêr a li dijî jinê di meha Cotmehê de zêde bûye, di nava mehê de bi dehan jin ji ber tundiya mêr birîndar bûn, neçarî xwekuştinê hatine hiştin û jiyana xwe ji dest dane. Di raporê de hat destnîşankirin ku zêdebûna komkujî, destavêtin û destdirêjiyê, gunehê dewleta ku jinê naparêze ye.

Di rapora ku ji nûçeyên çapemeniya neteweyî û herêmî hat amadekirin de hat ragihandin ku di meha Cotmehê de 24 jin ji aliyê mêrên herî nêzî xwe ve bi çek û kêrê ve hatine qetilkirin, keçeke 6 salî jî bi tivingê hatiye qetilkirin.

Li gorî raporê 3 jin di encama tundiya mêr de dawî li jiyana xwe anîne, 9 jin rastî destavêtin û destdirêjiyê hatine, 19 jin bi kêr, çek û tivingê hatine birîndarkirin.

Di 10 mehên sala 2013'an de ji ber tundiya mêr herî kêm 149 jinan jiyana xwe ji dest dan.

- Di meha Îlonê de yek jê bûka temen zarok 24 jin hatin qetilkirin, jinek bi kêrê birîndar bû, di encama birîndarkirinê de jinek ji aliyê mejî ve mir, 2 bûyerên xwekuşinê, îstîsmareke zayendî, hewldanek destavêtinê û 3 bûyerên destavêtinê rû dane.

- Di meha Tebaxê de 18 jin ji ber tundiya mêr jiyana xwe ji dest dan, 9 jin bi kêr û çekan hatin birîndarkirin, 3 jin rastî destavêtinê hatin.

- Di meha Tîrmehê de, 17 jin hatin qetilkirin, 18 jin û zarokên keç rastî destavêtinê hatin.

- Di hema Hezîranê de 8 jin ji aliyê mêr ve hatin qetilkirin, bûkeke zarok neçarî xwe kuştinê hat hiştin, 7 jin rastî tundiya zayendî û fîzîkî rast hatin.

- Di meha Gulanê de 11 jin hatin qetilkirin, 10 jin rastî destavêtin û tundiyê hatin.

- Di meha Nîsanê de 12 jin hatin qetilkirin, 8 jin rastî destavêtin û tundiya mêr hatin.

- Di meha Adarê de 11 jin ji aliyê mêrên nêzî xwe ve hatin qetilkirin, yek neçarî xwekuştinê hat hiştin, 11 jin rastî destavêtin, destdirêjî û tundiyê hatin.

- Di meha Sibatê de 11 jin ji aliyê mêrên nêzî xwe ve hatin qetilkirin, 10 jin rastî tundiya zayendî û fîzîkî ya mêr hatin. 

- Di meha Çileyê de 13 jin hatin qetilkirin, 7 jin rastî destavêtinê hatin.