Li Marsîlyayê ji bo şermezarkirina Komkujiya Elewiyên Sûriyeyê yên ji aliyê hêzên girêdayî rêveberiya Heyet Tahrîr El Şam (HTŞ) hat kirin, mitîng hat lidarxistin.

Navenda Civaka Kurd a Demokratîk a Marsîlyayê piştgirî da mîtînga ku bi pêşengiya Navenda Çanda Elewiyan a Marsîlyayê hat lidarxistin.

Endamê Tevgera Elewî yên Fransayê Alî Riza Akyol di mitîngê de axivî û got, “Ji bo em li dijî van barbaran rawestin, divê em bên ba hev û bi xurtî li hemberî komkujiyan têbikoşin.”

Nûnera Navenda Çanda Elewiyan jî anî ziman ku dewleta Tirk çeteyên SMO’yê li Mereşê bi cih dike û bi vî awayî amadekariya komkujiyê dike. Nûner bang li dewletên Ewropayê jî kir û got, “Komkujiyan demildest rawestînin.”

Piştî axaftinan, daxuyaniya Komîsyona Têkiliyên Giştî ya Tevgera Elewiyan a Fransayê hat xwendin. Di daxuyaniyê de bal kişandin ser girîngiya hevgirtina civakî û têkoşîna hevpar.

Di daxuyaniyê de hat diyarkirin ku zîhniyeta qirker a mîna HTŞ û pêkhateyên radîkal ne tenê li Sûriyeyê, di dîrokên cuda de li Mereş, Çorûm, Dersim, Roboskî û Helebceyê hate dîtin û wiha domand: "Em ê ti carî rê nedin vê feraseta tarî û li hemberî zilmê bêdeng nemînin."

Di dawiya daxuyaniyê de hat destnîşankirin ku kesên di bin zilmê de ne neçarin hevgirtin û têkoşîna hevpar bimeşînin.