Li Awûstûryayê çalakiyên ji bo azadiya Rêberê Gelê Kurd Abdullah Ocalan dewam dikin. Di çarçoveya pêngava "Ji Abdullah Ocalan re azadî, ji Kurdistanê re statu" gelek çalakî hatin lidarxistin û wê bidomin.

Li Awûstûryayê li Viyana, Graz û Lînzê çalakiyên xwendina berhemên Rêberê Gelê Kurd Abdullah Ocalan hatin lidarxistin.

-Li ser komploya navneteweyî û berxwedana Îmraliyê wê bi parêzerê Rêberê Gelê Kurd Cengîz Yureklî û Wekîlê Kamûran Tangan re hevdîtinên gel bên lidarxistin. 8’ê Cotmehê li Lînzê, 9’ê Cotmehê Viyanayê, 10’ê Cotmehê Grazê, St.Polten dê civîn bên lidarxistin.
-Bi wesîleya 10'ê Cotmehê Roja ji Ocalan re Azadî ya Cîhanê li navenda Viyanê wê 12'ê Cotmehê saet 16:00'an li ber parlamentoyê çalakiya navendî bê lidarxistin. Komplo li Lînz, Graz û Înnsbrûckê hat protestokirin. Di şexsê Rêberê Gelê Kurd de ji girtiyên nexweş ên li Tirkiye û Kurdistanê re peyama azadî û têkoşîna li dijî tecrîdê hatin dayîn.

'KOMPLO JI ŞERÊN ÎRO RE NE QUT E’

Serokê Civaka Azad a Awûstûryayê Ahmet Zîrek têkildarî amadekariyên çalakiyê yên Awûstûryayê û komploya 9'ê Cotmehê nirxandin kir.

Ahmet Zîrek got, "Komploya navneteweyî ya di 9'ê Cotmeha 1998'an de pêk hat, di rastiyê de destpêka ji nû ve dîzaynkirina vê pergala cîhanê bû û ev komplo li dijî Rêberê Gelê Kurd pêk hat. Dema em li Rojhilata Navîn û şerên li cîhanê dinêrin. Piştî komploya navneteweyî sîstem di serî de Efganistan û Iraqê hewl da sîstema wir dîzayn bike. Dewleta Tirk li Îmraliyê gardiyantiyê dike. 
Ji ber ku paradîgmaya nû li dijî vê pergalê alternatîfek e û li gor wê li Rojhilata Navîn Kurd, Ereb, Suryanî, Ermenî û hemû miletên din dikarin lê bijîn, astenga herî mezin a li pêşiya avakirina pergala nû ya cîhanî ye. Liha tişta ku dikeve ser milê me û beşên din ên civakê ew e ku em xwedî li fikrên Rêberê Gelê Kurd derkevin û azadiya Rêber Apo pêk bînin. Da ku cîhanê ji vî şerî xilas bikin û aştiyê pêk bînin. Erka me azaakirina Rêberê Gelê Kurd e.
Starta rojên xwendin û famkirina Rêbertî dest pê kiriye û meha li pêşiya me ev ê li hemû herêmên me belav bibe. 2’yê Cotmehê li Graz, 3’yê Cotmehê Lînz, 4’ê Cotmehê Innsbruckê û herêmên din rojên xwendin û famkirina Rêbertî hatin lidarxistin. Her wiha ji aliyê heval û dostên enternasyonalîst jî roja xwendina Rêbertî di 3’yê Cotmehê de li Viyanayê pêk hat. Bi pêşengiya Tevgera Jinan a Avestayê di navbera 1 û 12'ê Cotmehê de wê bi giranî ev çalakî bên lidarxistin. Dîsa li Innsbruck, Graz, Linz û Viyanayê wê çend çalakiyên me hebin û herî dawî di 12'ê Cotmehê de wê li Viyana bi beşdariya hemû herêman meşeke navendî were lidarxistin.
Ji bo daxwazkirina azadiya Rêberê Gelê Kurd em hemû Kurdistanî, welatparêz û hevalên xwe vedixwînin çalakiya xwe ya 12'ê Cotmehê ya li pêşiya parlamentoyê li dar bixin."